RDC: Leta ya Kinshasa yongeye gushimangira ivuga ikizatuma yemera ibiganiro n’amahoro
Guverinoma ya Repubulika ya Demokarasi ya Congo yatangaje imyanzuro ikarishye ijyanye n’umutekano n’imibanire n’imitwe yitwaje intwaro, cyane cyane ku bijyanye n’ibiganiro, ubusugire bw’igihugu n’umubano n’u Rwanda.
Mu itangazo ryasohowe n’abategetsi ba Leta ndetse rikemezwa n’ibiro by’umukuru w’igihugu, hagarutswe ku ngingo zikomeye:
- “Nta na rimwe tuzaganira n’imitwe y’iterabwoba.” Leta ya Congo ivuga ko ibiganiro n’imitwe nka M23 ari umurongo utukura utagomba kurengwa. Ivuga ko kwicarana n’iyo mitwe byaba ari ugusuzugura abenegihugu bashegeshwe n’iyo ntambara.
- Ingabo z’u Rwanda kuvanwa ku butaka bwa RDC nk’icyemezo fatizo,Perezida Félix Tshisekedi aheruka gusobanura ko atazigera asinya amasezerano y’amahoro, yaba i Washington cyangwa ahandi hose, keretse habayeho kubuhariza ubusugire bwa RDC, harimo no kuvana ingabo z’u Rwanda bivugwa ko ziri ku butaka bwa Congo. Gusa ibi u Rwanda rurabihakana ruvuga ko ntanga zarwo ziri ku butaka bwa RDC.
- “Nta brassage cyangwa mixage.” Congo ivuga ko itazongera kuvanga ingabo n’inyeshyamba, igasobanura ko uwo ari umutego mubi, ngo kuko guhuza ingabo za Leta n’imitwe yitwaje intwaro, byagiye bigaragara ko bitanga umusaruro muke kandi bigateza ibibazo mu buyobozi bwa gisirikare.
- Gahunda yo gufungura ikibuga cy’indege cya Goma. Perezida Tshisekedi yasabye guverinoma gutegura uburyo bwo gufungura ikibuga cy’indege cya Goma ku mpamvu z’ubutabazi (humanitaire) bitarenze impera z’uyu mwaka wa 2025, nk’imwe mu ngamba zo gufasha abaturage bo mu Burasirazuba bahangayikishijwe n’intambara n’inzara.
Icyo ibi bivuze: Iyi myanzuro igaragaza ko RDC irimo gufata umurongo ukomeye w’igisirikare n’ubusugire bwayo, ikanagaragaza ko amasezerano y’amahoro adashingiye ku kuri no ku byakozwe.
