Ukuri kutavugwa ku bivugwa ko habaye imirwano mu Rugezi
Amakuru yari yakwirakwiye mu bitangazamakuru bikorera hafi y’ubutegetsi bwa Perezida Félix Tshisekedi yavugaga ko habaye imirwano ikaze mu Rugezi, hagati y’umutwe wa Twirwaneho n’undi wa Mai Mai uyobowe na Ngomanzito. Ariko ubu amakuru yizewe yemeza ko ibyo byose ari ibihuha.
Minembwe Capital News, ishingiye ku buhamya bw’abaturage ndetse n’inzego zizewe z’umutekano, yatangaje ko kuri iki cyumweru, abarwanyi ba Twirwaneho bari mu bikorwa bya patrouille mu gace ka Rugezi, mu ntara ya Kivu y’Amajyepfo, ubwo baraswaga na Mai Mai. Nta mirwano yabayeho kuko Twirwaneho itigeze isubiza.
Umwe mu baturage wari aho yabwiye Minembwe Capital News ati:
“Twirwaneho yagiye muri patrol, adui ibabonye irarasa. Ariko ntantambara yabaye. Umwazi yakomeje kurasa ubusa.”
Ibi bihabanye n’ibyatangajwe n’abanyamakuru nka Byobe Byamalanga, bavuze ko imirwano yari yabereye ahitwa Timbyangoma na Rudabadaba. Nyamara amakuru yavuye ahabereye ibivugwa, yemeza ko mu duce twose twavuzwe harimo ituze.
Kugeza ubu, umutwe wa Twirwaneho ukomeje kugenzura uduce twa Rugezi, Minembwe na Mikenke, aho wafashe kuva mu ntangiriro z’uyu mwaka. Ibyo byakurikiye ibikorwa bya gisirikare byarimo kwirukana ingabo za FARDC, iz’u Burundi na Wazalendo.
Iyi nkuru ishimangira ikibazo gikomeye cy’amakuru atariyo akwirakwizwa mu rwego rwo kuyobya abaturage no kubangamira ituze rimaze iminsi rigaruka mu bice bimwe bya Kivu y’Amajyepfo. Itangazamakuru rirakangurirwa gukoresha amakuru yizewe aho kwishingikiriza kuri propagande z’abanyapolitiki.