U Bushinwa Mu Ruhando Mpuzamahanga, Raporo Ivuga Iterambere Rikomeye ku Ntwaro za Kirimbuzi, Beijing Ikabyamagana Yivuye Inyuma
Mu gihe isi ikomeje kwinjira mu cyiciro gishya cy’ihangana rya politiki n’igisirikare hagati y’ibihugu bikomeye, raporo nshya yashyizwe ahagaragara n’ikigo mpuzamahanga Bulletin of the Atomic Scientists, gikorera i Chicago muri Leta Zunze Ubumwe za Amerika, yagaragaje ko u Bushinwa buri gutera intambwe idasanzwe mu kongera no kuvugurura ububiko bwabwo bw’intwaro za kirimbuzi, ku muvuduko urenze uw’ibindi bihugu byose bifite izo ntwaro.
Iyi raporo ivuga ko Beijing iri gushyira imbaraga nyinshi mu kongera ubushobozi bwa gisirikare bushingiye ku ntwaro za kirimbuzi n’izindi ntwaro zigezweho, mu rwego rwo kwiyubaka nk’imbaraga ikomeye ku rwego rw’isi. Abanditsi b’iyi raporo bagaragaza ko iri terambere rishobora kongera igitutu ku mutekano mpuzamahanga, cyane cyane mu gihe umwuka w’ubwumvikane buke, amakimbirane n’intambara bikomeje kwiyongera mu bice bitandukanye by’isi.
Icyakora, Guverinoma y’u Bushinwa yahise yamagana ibi bivugwa, ibisobanura nk’ibihuha n’amakuru agambiriye guharabika isura y’igihugu ku ruhando mpuzamahanga. Mu itangazo ryashyizwe ahagaragara na Minisiteri y’Ububanyi n’Amahanga y’u Bushinwa, Beijing yavuze ko ibi birego “bidafite ishingiro na busa” kandi ko bigamije kuyobya amahanga no guteza umwuka w’amacakubiri hagati y’ibihugu.
U Bushinwa bwashimangiye ko politiki yabwo mu bya gisirikare ishingiye ku kwirinda no kurinda ubusugire bw’igihugu, bukavuga ko butigeze bushyira imbere umugambi wo gutangiza intambara cyangwa guhungabanya umutekano w’isi.
Mu ntekerezo z’abasesenguzi mpuzamahanga, uku kudahuza hagati ya raporo z’ibigo byigenga n’ibisobanuro bya guverinoma y’u Bushinwa bigaragaza uko intambara y’ubutita iri gusubira mu isura nshya, aho Amerika, u Burusiya n’u Bushinwa bikomeje guhangana mu bya politiki, ubukungu n’igisirikare.
Abahanga mu by’umutekano w’isi bemeza ko hakenewe ibiganiro bifatika kandi birambye hagati y’ibihugu bikomeye, bigamije kugabanya ubwiyongere bw’intwaro za kirimbuzi no gukumira intambara ishobora kugira ingaruka zikomeye kandi z’igihe kirekire ku baturage b’isi yose.
