U Rwanda n’u Burusiya byiyemeje kwagura ubufatanye mu nzego z’ingenzi za dipolomasi n’iterambere
Ku wa Gatanu tariki ya 19/12/2025, Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe, yagiranye ibiganiro na Minisitiri w’Ububanyi n’Amahanga w’u Burusiya, Sergey Lavrov, bigamije kurushaho guteza imbere no kwagura umubano w’ibihugu byombi.
Ibi biganiro byabereye i Cairo mu Misiri, aho aba bayobozi bakuru ba dipolomasi bari bitabiriye inama ya kabiri ihuza ba Minisitiri b’Ububanyi n’Amahanga, yiga ku bufatanye hagati ya Afurika n’u Burusiya. Iyo nama igamije gushimangira ubufatanye bushingiye ku nyungu rusange, iterambere rirambye n’ubwumvikane bwa dipolomasi.
Abinyujije ku rubuga rwe rwa X (yahoze ari Twitter), Amb. Nduhungirehe yatangaje ko ibiganiro yagiranye na mugenzi we w’u Burusiya byabaye ingirakamaro, bagaragaza kunyurwa n’intambwe imaze guterwa mu bufatanye hagati y’u Burusiya na Afurika muri rusange, ndetse banasesengura uburyo umubano wihariye hagati y’u Rwanda n’u Burusiya warushaho kwagurwa.
Ati: “Ndashimira Nyakubahwa Sergey Lavrov ku biganiro byiza twagiranye i Cairo, aho twagaragaje kunyurwa n’iterambere ry’Ubufatanye hagati y’u Burusiya na Afurika, tunasuzuma umubano mwiza uri hagati y’ibihugu byacu n’uburyo watezwa imbere kurushaho.”
Ku ruhande rw’u Burusiya, Minisiteri y’Ububanyi n’Amahanga yatangaje, ibinyujije ku rubuga rwayo rwa Telegram, ko ibiganiro byibanze ku gushakisha inzego nshya z’ubufatanye zirimo ubucuruzi, ubukungu, ndetse n’ibikorwa by’ubutabazi, mu rwego rwo gushimangira umubano ushingiye ku nyungu z’impande zombi.
Aba bayobozi bombi kandi baganiriye ku bibazo by’umutekano muke mu karere, by’umwihariko ibibera muri Repubulika ya Demokarasi ya Congo (RDC). U Rwanda rwashimiye u Burusiya ku ruhare rukomeje kugira mu gushyigikira inzira zitandukanye za dipolomasi zigamije kugarura amahoro n’umutekano muri icyo gihugu.
Umubano wa dipolomasi hagati y’u Rwanda n’u Burusiya watangiye ku mugaragaro tariki ya 17/10/1963, ubwo u Burusiya bwari bukiri mu Bumwe bw’Abasoviyete. Icyo gihe, u Rwanda rwari rumaze igihe gito rubonye ubwigenge tariki ya 30/06/1962, kandi Ubumwe bw’Abasoviyete bwari bwarabanje kohereza ubutumwa bushyigikira ubwigenge n’ubusugire bw’igihugu.
Uyu mubano umaze imyaka irenga 60 ushingiye ku bufatanye mu nzego zitandukanye zirimo politiki, igisirikare, uburezi, iterambere ry’ubumenyi n’ubushobozi bw’abakozi, ndetse n’umuco. U Burusiya bukomeje gutanga buruse ku banyeshuri b’Abanyarwanda biga muri kaminuza zayo mu masomo atandukanye, ndetse bugafasha mu guhugura bamwe mu bofisiye ba Polisi y’u Rwanda.
Mu myaka irenga 50 ishize, abanyeshuri b’Abanyarwanda barenga 100 barangije amasomo muri kaminuza zo mu Burusiya mu byiciro bitandukanye birimo ikoranabuhanga, amategeko, ubuvuzi na politiki, bigira uruhare rukomeye mu iterambere ry’u Rwanda.
Ku ruhande rw’ubucuruzi, u Rwanda rwohereza mu Burusiya ibicuruzwa bikomoka ku buhinzi birimo ikawa n’icyayi, bikaba bimwe mu byubakiye ku musaruro w’ikirango cyiza u Rwanda rumaze kugeraho ku masoko mpuzamahanga.
Ibiganiro byabereye i Cairo bigaragaza ubushake bw’ibihugu byombi bwo gukomeza kubaka umubano ukomeye, wubakiye ku bufatanye bw’igihe kirekire, guteza imbere iterambere rusange no gutanga umusanzu mu mahoro n’ituze by’Afurika n’isi muri rusange.
