Ikiraro cya Kavimvira Cyasenyutse, Abatari Bake Bahasiga Ubuzima; Urujya n’uruza rw’Abantu n’Ibintu Rurahagarara
Muri Teritwari ya Uvira, mu Ntara ya Kivu y’Amajyepfo muri Repubulika Iharanira Demokarasi ya Congo, ku munsi w’ejo ku wa Kabiri tariki ya 16/06/2026, habaye impanuka ikomeye yatewe n’isenyuka ry’ikiraro cya Kavimvira, cyari kimaze igihe gikoreshwa nk’inzira nyamukuru ihuza uduce dutandukanye two muri iyi teritwari ya Uvira.
Nk’uko amakuru aturuka kuri Minembwe Capital News abivuga, iyi mpanuka yahitanye abantu batatu, barimo abana babiri: umwe w’imyaka 14 n’undi w’imyaka 17, ndetse n’umuntu mukuru umwe. Aya makuru yemejwe n’Urwego rw’Imiryango ya Sosiyete Sivile muri Kivu y’Amajyepfo (NSCC Sud-Sud) mu itangazo ry’agateganyo ryashyizwe ahagaragara kuri uyu wa Gatatu.
Uretse abahasize ubuzima, iyi mpanuka yanakomerekeyemo umugore umwe, mu gihe kandi hagaragaye n’ibyangiritse byinshi, by’umwihariko ku ikamyo yari itwaye ibicuruzwa yanyuraga kuri icyo kiraro ubwo cyasenyukaga.
Isenyuka ry’iki kiraro ryahise rituma umuhanda wa RN5 (Route Nationale 5) uhagarara burundu muri ako gace, bikadindiza cyane urujya n’uruza rw’abantu n’ibicuruzwa, kuko ari inzira y’ubukungu ifite akamaro kanini mu buhahirane bwa Teritwari ya Uvira.
Umuhuzabikorwa w’Urwego rwa NSCC ku rwego rw’intara, Martin Mafikiri Mashimango, yatangaje ko iri huriro ry’imiryango ya sosiyete sivile rigiye gukora ubuvugizi bukomeye kugira ngo inzego zibishinzwe zitange igisubizo cyihuse ku kibazo cyavutse.
NSCC isaba ko hakorwa ubutabazi bwihuse ku miryango yabuze abayo, hakoroherezwa ishyirwaho ry’inzira y’agateganyo (déviation) irambye kugira ngo urujya n’uruza rusubukure, ndetse hakihutishwa uruhare rwa sosiyete EIS-EKA, isanzwe yubaka ikiraro gishya kigezweho cyari kimaze gutangira kubakwa, kugira ngo imirimo yacyo yihutishwe.
Iyi mpanuka yongeye kugaragaza ikibazo cy’inyubako z’ibikorwa remezo zishaje cyangwa zitinda kubakwa mu bice bimwe by’igihugu, bikagira ingaruka zikomeye ku mutekano w’abaturage no ku bukungu bw’uturere.
