Amato Abiri Yagonganiye ku Ruzi rwa Congo: Ibyabaye Byasize Abagenzi Benshi mu Kaga
Minembwe Capital News (MCN)
Abantu 30 bahitanywe n’impanuka y’amato abiri y’ibiti yagonganiye ku Ruzi rwa Congo, ruzwi kandi nka Fleuve du Congo, hafi ya Ngombe-Lukolela, mu Ntara ya Équateur, muri Repubulika Iharanira Demokarasi ya Congo.
Iyi mpanuka yabaye ku mugoroba wo ku Cyumweru, ubwo ubwato bwavaga i Ubangi bwerekeza i Kinshasa bwagonganaga n’ubwari buvuye i Kinshasa bwerekeza i Lukolela.
Impamvu nyirizina y’iyi mpanuka ntiramenyekana neza. Icyakora, umutangabuhamya wari hafi y’ahabereye impanuka yavuze ko ubwato bwavaga i Ubangi bwari buremerewe n’imizigo myinshi.
Nyuma yo kugongana, ubwato bwararengewe, bituma abagenzi benshi bagwa mu mazi barengerwa n’umugezi. Abatabazi bamaze kubona imirambo 30, ikaba yanashyinguwe, mu gihe abantu 59 ari bo barokotse. Ibikorwa byo gushakisha abandi baburiwe irengero biracyakomeje.
Minisitiri w’Ubutegetsi bw’Igihugu muri Équateur, Crispin Mputu, yavuze ko ingendo zo mu mazi zikorwa nijoro zimaze guteza impanuka nyinshi muri ako gace, bityo agaragaza ko hagiye gufatwa ingamba zikaze.
Minembwe Capital News (MCN)
