Abaturage ba Congo Kinshasa bemerewe ubufasha bukomeye.
Ni Leta Zunze Ubumwe z’Amerika zigiye guha ubufasha bw’amafaranga Repubulika ya demokarasi ya Congo angana na miliyoni 414 yo kugoboka abaturage b’iki gihugu.
Aya makuru yamenyekanye nyuma y’ikiganiro ambasaderi wa Leta Zunze Ubumwe z’Amerika mu ishami ry’umuryango w’Abibumbye rishinzwe ubuhinzi n’ibiribwa, Jeffrey Prescott yagiranye n’ibiro ntara makuru bya Bongereza, Reuters, agaragaza ko iki gihugu cy’Amerika ko kigiye gufasha abaturage ba RDC.
Akaba yanavuze ko aba baturage mu byo bazafashwa ahanini bizanyuzwa muri ONU.
Ndetse kandi akaba yagaragaje ko bazafashwa ibiribwa, amazi meza asukuye kandi ko bazagerageza kubaha ibiribwa bifite intunga mubiri.
Prescott avuga ko yizeye neza ko Leta Zunze Ubumwe z’Amerika izabera urugero ibindi bihugu, nabyo bigakura mu masanduku yabyo imari yo kugoboka Repubulika ya demokarasi ya Congo.
Ni mu gihe n’umuryango w’Abibumbye, ONU urimo gusaba abanyamuryango bayo gukusanya muri uy’u mwaka amadolari y’Amerika miliyari 2.6 yo gufasha abari mu kaga muri RDC. Inasobanura ko imaze kubona kimwe cya gatatu cyayo.
Kuva mu 2022, intambara ya M23 n’ingabo z’iki gihugu yirukanye mu byabo abaturage barenga miliyoni 1,7 mu Burasirazuba bwa RDC. Biyongereye ku bandi bari basanzwe baravuye mu byabo ku buryo ubu babaye impunzi imbere mu gihugu bashyika miliyoni 7.2.
Muri rusange abaturage ba Repubulika ya demokarasi ya Congo bakeneye imfashanyo zihutirwa barenga miliyoni 25, hafi kimwe cya kane cy’abatuye RDC.
Muri ibi bibazo biteye impungenge harimo iby’abana barenga miliyoni barwaye inkurikizi z’imirire mibi, nk’uko OMS ibitangaza. Harimo kandi n’icyorezo cy’ubushita bw’inkende. Kuva mu ntangiriro z’umwaka ushize w’2023, abantu bagera ku 2,000 barabwanduye cyane abana.
Uyu ambasaderi Prescott yanabwiye kandi ibiro ntara makuru bya Bongereza ko Amerika izaha RDC andi madolari miliyoni 10 mu rwego rw’ubuvuzi na dose 50.000 z’inkingo z’ubushita bw’inkende. Muri rusange, avuga ko kuva mu kwezi kwa Cumi gushize kugeza ubu, Leta Zunze Ubumwe z’Amerika imaze gusohora amadolari miliyoni 838 y’imfashanyo zihutirwa kuri Congo Kinshasa.
MCN.
