RDC Yashimye Ibihano bya Amerika ku Ngabo z’u Rwanda
Guverinoma ya Repubulika Iharanira Demokarasi ya Congo (RDC) yatangaje ko yakiriye neza icyemezo cya Leta Zunze Ubumwe za Amerika cyo gufatira ibihano abasirikare bakuru bo mu Rwanda Defence Force (RDF), ibinyujije ku rwego rushinzwe kugenzura imitungo n’ibihano mpuzamahanga rwa Minisiteri y’Imari ya Amerika, Office of Foreign Assets Control (OFAC).
Mu itangazo ryashyizwe ahagaragara na Minisiteri y’Itumanaho n’Itangazamakuru ya RDC ku wa Mbere, Guverinoma ya Kinshasa yagaragaje ko ibi bihano ari “ikimenyetso gikomeye cyo kubahiriza ubusugire n’ubwigenge bw’ibihugu,” inashimangira ko bigomba kujyana n’ishyirwa mu bikorwa ry’imyanzuro yafatiwe mu masezerano azwi nka Accords de Washington.
RDC yagaragaje ko ituze rirambye mu Burasirazuba bw’igihugu no mu karere k’Ibiyaga Bigari rizagerwaho binyuze mu guhagarika inkunga iyo ari yo yose ihabwa imitwe yitwaje intwaro, kubahiriza ubusugire n’ubwigenge bw’ibihugu, no gukurikiza amahame y’amategeko mpuzamahanga.
Guverinoma ya Kinshasa yibukije ko hakenewe “ubudaheranwa mu guhuza ibikorwa bya dipolomasi n’ibikorwa bigaragara ku butaka,” mu rwego rwo kwirinda icyuho hagati y’amasezerano ashyirwaho n’ibikorwa bishobora kuyanyuranya.
Mu gihe ibi bihano byatangajwe, hakomeje inzira y’ibiganiro biyobowe n’abahuza mpuzamahanga barimo Leta Zunze Ubumwe za Amerika, Qatar na Angola, hagamijwe kugarura ituze n’umutekano mu Burasirazuba bwa RDC.
U Rwanda, nubwo Amerika yafatiye ibihano abasirikare barwo kubera intambara yo mu Burasirazuba bwa RDC, aho bashinjwa gutera inkunga AFC/M23 irwanya Leta ya Kinshasa, rwakomeje kubitera utwatsi rugaragaza ko rushyigikiye byimazeyo iyi nzira y’ibiganiro. Rushimangira ko igisubizo kirambye ku bibazo by’umutekano mu karere gishingiye ku bufatanye bw’ibihugu, kubahana no kubahiriza amahame y’ubusugire bwa buri gihugu. Mu bihe bitandukanye, u Rwanda rwagiye rugaragaza ko rwiteguye gukorana n’abahuza mpuzamahanga mu gushaka ibisubizo bya dipolomasi bigamije amahoro arambye mu karere k’Ibiyaga Bigari.
RDC yanagaragaje “gushima byimazeyo” uruhare rwa Amerika mu bikorwa byo gushaka amahoro, ivuga ko ubuyobozi n’ubwitange byayo ari ingenzi mu kugarura ituze mu gihugu no mu karere muri rusange.
Kinshasa yasabye Washington gukomeza gushyigikira ishyirwa mu bikorwa ry’imyanzuro n’amasezerano byashyizweho, hagamijwe kugera ku mahoro arambye kandi asesuye.
Guverinoma ya RDC yasoje yemeza ko ikomeje kwiyemeza gukorana n’abafatanyabikorwa bayo bo mu karere no ku rwego mpuzamahanga mu kugarura burundu amahoro, umutekano n’ububasha bwuzuye bwa Leta ku butaka bwose bw’igihugu.
Ibi byose bibaye mu gihe akarere k’Ibiyaga Bigari gakomeje guhangana n’ibibazo by’umutekano bimaze imyaka myinshi, aho ibisubizo birambye bikomeje gushakirwa mu nzira ya dipolomasi, ibiganiro n’ubufatanye bw’ibihugu. Gusa, RDC ishinjwa n’u Rwanda ndetse n’Umuryango w’Abibumbye gukorana bya hafi n’umutwe wa FDLR washinzwe n’abagize uruhare muri Jenoside yakorewe Abatutsi mu Rwanda mu 1994.