Amakuru Mashya ku Mirwano ya Kabanju n’Isubira Inyuma ry’Ingabo za FARDC n’Abafatanyabikorwa Bazo
MINEMBWE CAPITAL NEWS
Amakuru yizewe Minembwe Capital News yakusanyije agaragaza ko tariki ya 30/07/2026, MRDP-Twirwaneho na AFC/M23 bigaruriye uduce tubiri tw’ingenzi twa Kimete na Kabanju, two muri Secteur ya Lulenge, Teritwari ya Fizi, mu Ntara ya Kivu y’Amajyepfo.
Amakuru aturuka ahantu hatandukanye, ndetse n’ayemejwe n’impande zimwe ziri mu mirwano, agaragaza ko igikorwa cyo kwigarurira utu duce cyabaye nyuma y’imirwano ikomeye yabereye mu nkengero z’ibice bya Rugezi, aho ihuriro rigizwe n’ingabo za FARDC, iz’u Burundi, imitwe ya Wazalendo na FDLR ryari ryagabye ibitero ku birindiro bya MRDP-Twirwaneho.
Kimete ifatwa nk’imwe mu ngingo z’ingenzi za gisirikare muri ako gace, aho yari ibirindiro bikomeye bicumbikiwemo ingabo za FARDC, iz’u Burundi, abarwanyi ba Wazalendo ndetse na FDLR. Nyuma y’iyo mirwano, MRDP-Twirwaneho ifatanyije na AFC/M23 yavuze ko yashoboye kwigarurira icyo gice mbere yo gukomeza ibikorwa byayo ikanafata Kabanju.
Ku ruhande rwa FARDC, ubuyobozi bw’igisirikare bwemeje ko Kimete na Kabanju byaguye mu maboko ya MRDP-Twirwaneho na AFC/M23. Icyakora, FARDC yavuze ko itahavuye itsinzwe, ahubwo ko yakoze icyo yise “isubira inyuma rya gisirikare” (repli tactique), rigamije kongera kwisuganya no gutegura ibindi bikorwa byo gusubirana ibyo bice.
Gusa amakuru yigenga Minembwe Capital News yahawe n’abaturage ndetse n’andi masoko yizewe ari hafi y’aho imirwano yabereye, agaragaza indi shusho itandukanye n’itangazo rya FARDC. Ayo makuru avuga ko nyuma yo gutakaza Kimete, ingabo za FARDC n’abo bafatanyije, barimo iz’u Burundi, Wazalendo na FDLR, bakomeje gusubira inyuma berekeza mu gace ka Milimba, nubwo kugeza ubu nta mirwano mishya iratangazwa hagati y’impande zombi muri uwo murongo.
Ku bijyanye na Kabanju, amakuru yizewe Minembwe Capital News yakiriye avuga ko nyuma yo kuyigarurira, abarwanyi ba MRDP-Twirwaneho bongeye kuyivamo, ariko ko ibyo bidasobanuye ko batsinzwe.
Amakuru aturuka hafi y’aho agira ati:
«”Kabanju MRDP-Twirwaneho bayikuyemo, ariko kubera ko ari ahantu hahanamye kandi hatoroshye kurwaniramo, basubiye inyuma mu Marango, harimo n’ahitwa Gipimo.”»
Aya makuru agaragaza ko uku kuva muri Kabanju kwakozwe hashingiwe ku mpamvu z’imiterere y’ubutaka n’ingamba za gisirikare, aho bavuga ko ako gace kagoye kugenzura igihe hatabanje gushimangirwa ibindi birindiro biri hafi.
Kugeza ubu, nta makuru yemeza ko FARDC cyangwa abafatanyabikorwa bayo baba barongeye kwisubiza Kabanju. Ahubwo amakuru ahari agaragaza ko impande zombi zikomeje gukurikirana uko ibintu bihagaze, mu gihe abaturage bakomeje kugira impungenge z’umutekano n’ingaruka z’iyi mirwano.
Andi makuru agaragaza ko ingabo za FARDC n’abafatanyabikorwa bazo bakomeje gusubira inyuma berekeza mu bindi bice bigana i Milimba.
