Ambasade ya Amerika Yasobanuye Ukuri ku Ngwate ya Visa ku Banye-Congo
MINEMBWE CAPITAL NEWS (MCN)
Mu gihe ku mbuga nkoranyambaga hakomeje gukwirakwira amakuru yavugaga ko abaturage ba Repubulika Iharanira Demokarasi ya Congo (RDC) basaba visa ya Leta Zunze Ubumwe za Amerika bagomba kubanza gutanga ingwate y’amadolari ya Amerika 20,000, Ambasade ya Amerika i Kinshasa yasohoye itangazo ribihakana yivuye inyuma, ivuga ko ayo makuru ari ibihuha kandi ko RDC itari mu bihugu birebwa n’iyo gahunda nshya ya Visa Bond.
Iri tangazo rije nyuma y’uko ubutegetsi bwa Perezida Donald Trump butangaje gahunda nshya yo gukaza amategeko agenga abinjira muri Amerika. Iyo gahunda iteganya ko abaturage b’ibihugu bimwe na bimwe bashobora gusabwa gutanga ingwate iri hagati ya 5,000 na 20,000 USD mbere yo guhabwa visa z’ubukerarugendo cyangwa iz’ingendo z’akazi (B1/B2), hagamijwe kugabanya umubare w’abajya muri Amerika bakarenza igihe bemerewe kuhaguma.
Nyuma y’itangazwa ry’iyi gahunda, ku mbuga nkoranyambaga hakwirakwiye ubutumwa buvuga ko Abanyekongo na bo bagomba kwishyura 20,000 USD kugira ngo bahabwe visa. Ibyo byateye impungenge abaturage benshi, cyane cyane abanyeshuri, abacuruzi n’abari bateguye ingendo zijya muri Amerika.
Mu gusubiza ayo makuru, Ambasade ya Amerika i Kinshasa yavuze ko RDC itari ku rutonde rw’ibihugu birebwa n’iyo gahunda, kandi ko nta Munyekongo usaba visa muri iki gihe usabwa gutanga ingwate ya 20,000 USD. Yasabye abaturage kwirinda gukurikira amakuru aturuka ku mbuga nkoranyambaga, ahubwo bakajya bashingira ku matangazo atangwa n’inzego za Amerika zibifitiye ububasha.
Iri tangazo rije kandi mu gihe umubano hagati ya Kinshasa na Washington ukomeje kurushaho gukomera. Mu mezi ashize, Leta Zunze Ubumwe za Amerika zakomeje gushyigikira RDC mu bikorwa byo gushaka amahoro mu Burasirazuba bw’igihugu, mu biganiro byabereye i Washington no muri Qatar, ndetse no gushimangira ubufatanye mu by’umutekano, ubukungu n’ishoramari, cyane cyane mu rwego rw’amabuye y’agaciro afitiye isi akamaro gakomeye, arimo cobalt, lithium na coltan.
Nubwo mu kwezi kwa gatanu kwa 2026 Amerika yari yarahagaritse by’agateganyo serivisi zo gutanga visa muri RDC kubera impungenge z’ubuzima rusange zijyanye n’icyorezo cya Ebola, icyo cyemezo nticyari gifitanye isano na gahunda y’ingwate ya visa cyangwa n’umubano wa dipolomasi hagati y’ibihugu byombi.
Ababikurikiranira hafi bavuga ko gutangaza aya makuru vuba byari ngombwa kugira ngo hirindwe urujijo rwashoboraga gutuma abaturage batinya gusaba visa cyangwa bagashukwa n’abatekamutwe n’abanyabyaha bakoresha amakuru y’ibinyoma mu kwambura abantu amafaranga.
Kugeza ubu, nta mpinduka zatangajwe ku basaba visa baturuka muri RDC, kandi Ambasade ya Amerika ikomeje gusaba abaturage gukurikirana amakuru atangazwa n’inzego zayo zemewe aho kwizera ibihuha bikwirakwizwa ku mbuga nkoranyambaga.
