Beni: Umusirikare wa UPDF Yashinje FARDC Ubwicanyi Bukorerwa Abaturage
Mu majyepfo ashyira uburasirazuba bwa Repubulika Iharanira Demokarasi ya Congo (RDC), cyane cyane mu gace ka Beni, hakomeje kuvugwa ibirego bikomeye byateje impaka ku rwego mpuzamahanga, nyuma y’uko hagaragaye videwo bivugwa ko yafashwe n’umusirikare w’Ingabo za Uganda (UPDF) uri mu bikorwa bihuriweho na FARDC.
Muri iyo videwo yakwirakwijwe ku mbuga nkoranyambaga, uwo musirikare wa UPDF yumvikana avuga ko inshingano z’igisirikare ari ukurinda abaturage. Agaragaza ko yahuye n’ishusho yamubabaje cyane ubwo yabonaga umusirikare uvugwa ko ari uwa FARDC arimo kwica umuturage mu buryo bw’iyicarubozo, harimo no kumukorera ibikorwa by’ubugome birimo kumukomeretsa bikomeye.
Uwo musirikare agaragaza ko ibyo yabonye binyuranye n’inshingano z’igisirikare, cyane cyane zirimo kurinda abaturage aho kubica. Aya magambo yakuruye impaka nyinshi, cyane cyane mu gihe akarere ka Beni kamaze igihe kagaragaramo ibikorwa by’urugomo n’ibitero byitwaje intwaro bikorwa n’imitwe itandukanye.
Mu mashusho agaragara muri iyo videwo, humvikana ijwi ry’uwo musirikare wa UPDF avuga ko igikorwa yabonye ari icy’ubugome gikomeye, aho ashinja uruhande rwa FARDC kuba rufite abasirikare bashobora kugira uruhare mu bikorwa byo kwica abaturage.
Gusa kugeza ubu, nta rwego na rumwe rwigenga rurashimangira ukuri kw’ibi birego, ndetse n’amazina y’uwavugwa ko ari umusirikare wa FARDC uvugwa muri ayo mashusho ntaratangazwa ku mugaragaro. Nta n’itangazo riragaragaza niba hari uwafashwe cyangwa niba hari ibihano byafashwe bijyanye n’icyo gikorwa kivugwa.
Aya makuru aje mu gihe akarere ka Beni kamaze imyaka myinshi kagaragaramo intambara n’umutekano muke, aho imitwe yitwaje intwaro n’ibikorwa bya gisirikare bihuriweho na FARDC n’ingabo z’amahanga bikunze gutera impaka ku bijyanye no kurengera abasivili.
Ibi bivugwa byose bishingiye ku mashusho yakwirakwijwe ku mbuga nkoranyambaga.
