Bwegera: Wazalendo Bafatiwe mu Mugambi wo Kugirira Nabi Abaturage, Bafatanywe Intwaro
Amakuru aturuka mu gace ka Bwegera, gaherereye mu Kibaya cya Rusizi, muri teritwari ya Uvira, mu ntara ya Kivu y’Amajyepfo muri Repubulika Iharanira Demokarasi ya Congo, aravuga ko abantu babiri bo mu mutwe wa Wazalendo bafatiwe muri ako gace, aho bivugwa ko bari gutegura ibikorwa by’ubugizi bwa nabi byibasira abaturage.
Ibi byabaye mu masaha make ashize, kuri uyu wa Kane tariki ya 16/04/2026, mu bice bivugwa ko bigenzurwa n’ihuriro rya AFC/M23. Amakuru ava aho byabereye agaragaza ko abo bantu bombi bafashwe bafite imbunda imwe, bahita batabwa muri yombi kugira ngo bakorweho iperereza.
Nk’uko abari hafi y’aho byabereye babitangaza, aba bafashwe bavugwaho kuba bari bafite umugambi wo kwinjira mu bice bigenzurwa na AFC/M23, bagamije kugirira nabi abaturage, by’umwihariko abo mu bwoko bw’Abanyamulenge, ndetse no gusahura imitungo yabo. Hari kandi amakuru avuga ko ibyo bikorwa byashoboraga gushyirwa ku mutwe wa AFC/M23 mu rwego rwo kuwusebya no kuwushinja ibikorwa by’ihohoterwa.
Umwe mu babonye ifatwa ry’aba Wazalendo yagize ati: “Abantu babiri bivugwa ko ari Wazalendo bafatanywe imbunda bafashwe na AFC/M23. Kuri ubu bari gukorwaho ibibazo, ariko ibimenyetso by’ibanze bigaragaza ko bari bafite umugambi wo kwica abaturage no gusahura.”
Ibi bibaye mu gihe umutekano ukomeje kuzamba mu burasirazuba bwa RDC, aho imitwe yitwaje intwaro ikorana bya hafi na Leta y’i Kinshasa ikomeje kwica abahaturiye. By’umwihariko, ubwicanyi n’ihohoterwa rikorerwa Abanyamulenge bikomeje kuvugwa mu bice bitandukanye bya Kivu y’Amajyepfo.
Amakuru atandukanye aturuka muri aka karere akomeza kugaragaza ko ibyo bikorwa bigayitse bikorwa n’ubufatanye hagati y’imitwe ya Wazalendo, ingabo za FARDC n’indi mitwe irimo FDLR, ndetse n’ingabo z’u Burundi.
Ku rundi ruhande, AFC/M23 ikomeje guharanira kurinda abaturage, cyane cyane abavuga Ikinyarwanda, bakomeje guhura n’ihohoterwa n’itotezwa rishingiye ku bwoko n’ururimi bavuga.
Ibi byabereye ku Bwegera byongeye kugaragaza ubukana bw’umutekano muke, ndetse n’ingaruka zawo ku baturage basanzwe, bakomeje kuba ari bo bahura n’ingaruka zikomeye z’intambara n’umutekano muke.
Abakurikiranira hafi ibibera muri aka karere bavuga ko hakenewe ingamba zihuriweho n’impande zose, zirimo ibiganiro bya dipolomasi n’ubwiyunge, kugira ngo umutekano ugaruke mu burasirazuba bwa RDC, aho ibikorwa by’intambara bikomeje gutwara ubuzima bw’abaturage no kubasiga iheruheru.
