Ijwi rya Revolusiyo y’i Mulenge: CEO Officer Ambasaderi w’Amahoro Akomeje Guhindura Umuziki Intwaro y’Ubuvugizi bw’Abanyamulenge

Mu gihe ikibazo cy’umutekano muke, ubwicanyi n’itotezwa bikomeje kuvugwa mu Burasirazuba bwa Repubulika Iharanira Demokarasi ya Congo, cyane cyane mu duce twa Minembwe, Masisi n’ahandi hatuwe n’Abanyamulenge ndetse n’Abatutsi muri rusange, umwe mu bahanzi bakomeje kuvugisha benshi ni Jean de Dieu, uzwi cyane ku izina rya CEO Officer Ambasaderi w’Amahoro.

Uyu muririmbyi ukomoka i Mulenge muri Kivu y’Amajyepfo, ubu uba mu gihugu cya Australia, amaze kuba izina rikomeye mu muziki w’indirimbo ziganisha ku mpinduka, ubuvugizi ndetse no gukangurira abantu kudaceceka ku bibazo byugarije abaturage bo mu Burasirazuba bwa Congo.

Mu myaka ishize, ibikorwa bye by’umuziki byagiye bifatwa nk’ijwi rya revolusiyo n’ubwirinzi bw’umuco, aho yakoresheje impano ye nk’intwaro yo kuvuganira abaturage bavuga ko bamaze igihe bahura n’ihohoterwa, kwimurwa mu byabo ndetse n’ubwicanyi bukomeje kuvugwa muri ako karere.

CEO Officer Ambasaderi w’Amahoro azwi cyane mu ndirimbo zitanga ubutumwa bwa politiki, amateka n’ubutwari. Mu bihangano bye byinshi, yakunze kuririmba agaruka ku mateka y’intwari z’Abanyamulenge ndetse n’abarwanyi bagiye bagira uruhare mu mirwano yo mu Burasirazuba bwa Congo.

Mu ndirimbo ze, akunze kuvuga amazina y’abayobozi ba gisirikare bafatwa nk’intwari mu bice by’i Mulenge na Masisi, barimo Général Charles Sematama, Général Rukunda Michel uzwi nka Makanika, Colonel Ndoli, Colonel Mitabu ndetse na Colonel Byinshi Moïse.

Aba bose bakunze kuvugwa mu ndirimbo ze nk’abarwanye mu rwego rwo kurinda abaturage bavuga Ikinyamulenge n’Abatutsi bavuga ko bakomeje guhura n’ibitero by’imitwe yitwaje intwaro ikorera mu Burasirazuba bwa Congo.

Ntabwo yagarukiye gusa ku ntwari z’i Mulenge, kuko yanavuze kenshi ku basirikare bavuka i Masisi, barimo Général Sultan Makenga n’abandi bafite amateka akomeye mu mitwe yitwaje intwaro yakunze gukorera muri Kivu y’Amajyaruguru.

Kimwe mu byatumye uyu muhanzi akundwa cyane n’Abanyamulenge baba imbere mu gihugu no mu mahanga, ni uburyo akunze kuririmba indirimbo zibutsa abantu iwabo i Mulenge, ubuzima bwo mu misozi ya Minembwe, ubworozi, umuco n’amateka byaranze ako gace.

Indirimbo ze zifasha benshi bari mu buhungiro cyangwa mu bihugu by’amahanga gukomeza kwiyumva nk’abafite aho bakomoka. Akenshi aririmba agaragaza agahinda k’abavuye iwabo kubera intambara, ariko akanabibutsa ko bafite amateka n’umuco bagomba gukomeza kurinda.

Mu bihangano bye kandi, CEO Officer Ambasaderi w’Amahoro akunze gutabariza abaturage b’Abanyamulenge bavuga ko bakomeje kugabwaho ibitero n’imitwe yitwaje intwaro irimo Wazalendo, FDLR ndetse n’izindi nyeshyamba zikorera mu Burasirazuba bwa Congo.

Hari aho anagaruka ku ruhare rw’ingabo za FARDC ndetse n’igisirikare cy’u Burundi, ibintu bikunze guteza impaka mu rwego rwa politiki n’umutekano mu karere k’Ibiyaga Bigari.

Abasesenguzi bamwe bavuga ko CEO Officer Ambasaderi w’Amahoro atari umuhanzi usanzwe, ahubwo ko ari umwe mu bantu bakoresheje umuziki nk’urubuga rwo gutanga ibitekerezo bya politiki no kuvuganira abaturage bamwe bavuga ko batabona ijwi mu buyobozi bwa Kinshasa.

Mu ndirimbo ze nyinshi, akunze kuvuga ku karengane avuga ko gakorerwa Abanyamulenge n’Abatutsi bo muri RDC, yaba abo muri Minembwe, Masisi cyangwa mu tundi duce tw’igihugu.

Akomeza kunenga ubutegetsi bwa Perezida Félix Tshisekedi, aho avuga ko bwagize uruhare mu kudakemura ikibazo cy’umutekano muke n’amacakubiri ashingiye ku moko n’ubwenegihugu bikomeje kuvugwa mu Burasirazuba bwa Congo.

Nubwo ibitekerezo bye bishimwa cyane n’abamushyigikiye, hari abandi babinenga bavuga ko indirimbo ze zishobora gukomeza gukongeza impaka za politiki n’amacakubiri mu karere. Gusa ku ruhande rw’abamukurikira, bavuga ko ari ijwi ry’abatagira kivugira kandi ko aririmba ubuzima abaturage banyuzemo.

Muri iyi minsi, CEO Officer Ambasaderi w’Amahoro yongeye gusohora indirimbo nshya zigaruka ku bikorwa n’ubutwari bwa MRDP-Twirwaneho, umutwe uvuga ko urwanira kurinda abaturage bo mu Minembwe n’abo mu bice bihana imbibi na ho.

Izi ndirimbo zikomeje gukwirakwira cyane ku mbuga nkoranyambaga no mu matsinda y’Abanyamulenge baba hirya no hino ku isi, cyane cyane muri diaspora yo muri Australia, Amerika, Canada n’u Burayi.

Ku bamukurikira, bavuga ko CEO Officer Ambasaderi w’Amahoro akomeje kuba “ijwi ridaceceka” ry’ubuvugizi bw’Abanyamulenge, mu gihe akarere k’Iburasirazuba bwa Congo gakomeje kuba isibaniro ry’intambara, politiki n’ibibazo by’amoko bimaze imyaka myinshi bidakemuka.