Manzi Merci: Umuhanzi wa Gospel wahaye umuziki intego yo guhimbaza Imana no kwibuka Abanyamulenge biciwe mu Gatumba

Manzi Merci: Umuhanzi wa Gospel wahaye umuziki intego yo guhimbaza Imana no kwibuka Abanyamulenge biciwe mu Gatumba

MINEMBWE CAPITAL NEWS

Umuhanzi w’indirimbo zo guhimbaza Imana, Manzi Merci, yatangaje ko ubuhanzi bwe yabweguriye Imana, aho afata kuririmba nk’umwe mu buryo akoresha mu gutanga ubutumwa bw’ukwizera, gukomeza abababaye no kwibuka amateka y’Abanyamulenge.

Mu kiganiro yagiranye na Minembwe Capital News ku mugoroba wo kuri uyu wa Gatandatu, Manzi Merci yavuze ko ari Umukristo wizera Yesu Kristo, akaba ari n’umubyeyi w’abana batatu, barimo abahungu babiri n’umukobwa umwe.

“Nkunda ubwoko bwanjye kandi ntanga umusanzu ushoboka”

Manzi Merci yavuze ko, nubwo ibikorwa bye by’ubuhanzi byibanda cyane ku ndirimbo zo guhimbaza Imana, atirengagiza amateka n’ibibazo by’abaturage akomokamo.

Yagize ati: “Nkunda ubwoko bwanjye kandi ntanga umusanzu ushoboka mu kuririmba indirimbo z’icyunamo mu kwibuka Abanyamulenge biciwe mu Gatumba, ndetse no guhimbaza Imana.”

Yasobanuye ko umuziki awubona nk’umuyoboro ushobora gutangirwamo ubutumwa bwo kwibuka, gukomeza abantu mu bihe bikomeye no kubibutsa ibyiringiro bifitanye isano n’ukwizera Imana.

Urugendo rw’ubuhanzi rwatangiye akiri muto

Manzi Merci yavuze ko impano yo kuririmba yatangiye kumugaragarira akiri muto, ahereye mu mwaka wa 1993.

Ati: “Byanjyemo cyane nkiri muto, mu mwaka wa 1993.”

Yasobanuye ko nyuma yo kugera mu Rwanda, yagiye muri École du Dimanche muri ADEPR, aho yakomeje gukurira mu myigishirize no mu bikorwa bishingiye ku myemerere ya Gikristo.

Mu mwaka wa 1999, yaje kujya muri Methodiste, avuga ko ari ho yatangiye kurushaho gukoresha impano ye mu kuririmba no guhanga indirimbo.

Guhindura no gutunganya indirimbo zo mu bitabo byo guhimbaza Imana

Mu ntangiriro z’urugendo rwe rwa muzika, Manzi Merci yavuze ko yakoze indirimbo nyinshi, ndetse ko hari n’indirimbo zo mu bitabo byo guhimbaza Imana yagiye ahindura cyangwa akazitunganya mu buryo bushya.

Mu ndirimbo yagarutseho harimo “Mana, Nk’uko Wafashaga”, avuga ko yayihinduye kugira ngo ayishyire mu buryo bw’umwimerere bumukwiye.

Yanasobanuye ko hari n’izindi ndirimbo yagiye ahindura, zirimo izivuga ku kwihangana, kutongera kubabara ndetse no kutarogoya imigambi y’Imana.

Rusizi yabaye intambwe ikomeye mu rugendo rwe rwa muzika

Mu mwaka wa 2005, Manzi Merci yimukiye i Rusizi, aho avuga ko ari hamwe mu hantu habaye ingenzi mu rugendo rwe rwa muzika.

Ni ho yaririmbiye indirimbo yise “Igisubizo”, nyuma akora n’indi yise “Ntidufite Gutinya Habe na Gato.”

Nyuma y’igihe, yatangiye gukora nk’umuhanzi wigenga, atangira gusohora indirimbo ze bwite.

Mu ndirimbo ze harimo “Maze Kumenya Uwo Ndi We” ndetse n’indi yise “Iyaguhamagaye Irahari.”

Yageze i Bujumbura mu bikorwa byo kwibuka Abanyamulenge biciwe mu Gatumba

Manzi Merci kandi yavuze ko yagiye aririmba mu bikorwa byo kwibuka Abanyamulenge biciwe mu Gatumba mu Burundi, aho yagiye inshuro zirenze imwe.

Ati: “Nagiye kuririmba i Bujumbura mu muhango wo kwibuka Abanyamulenge biciwe mu Gatumba mu myaka ishize, ndetse ngiyeyo inshuro zibiri.”

Yavuze kandi ko i Kigali yatumiwe kuririmba inshuro imwe, mu gihe no mu muhango wabereye i Goma yari yatumiwe ubushize.

Avuga ko hari indirimbo zimugeraho nk’ubutumwa bwihariye

Mu gusobanura uburyo ahanga indirimbo, Manzi Merci yavuze ko hari igihe igitekerezo cyangwa injyana y’indirimbo bimugeraho mu buryo atabiteguye mbere.

Yagize ati: “Mfite indirimbo nyinshi; uburyo nzikora, ziza mu nzozi. Naryama, cyangwa nkaba ndi mu nzira, hari igihe melody iza nkayifata muri telefoni.”

Kuri we, ubu buryo ni kimwe mu bimufasha gukomeza guhanga no gukora indirimbo nshya.

“Intego ni ukuririmbira mu Minembwe, hanyuma tukajya mu ijuru”

Manzi Merci yavuze ko intego ye y’ingenzi mu rugendo rw’ubuhanzi atari ukwamamara gusa, ahubwo ko ari ugukoresha impano ye mu guhimbaza Imana no gutanga ubutumwa bwubaka.

Ati: “Intego tukiri hano ku isi ni ukuririmbira Imana kandi nzagera no mu Minembwe, hanyuma tukazajya mu ijuru kubana n’abariyo.”

Iri jambo rigaragaza uburyo umuhanzi ashyira ukwizera kwe mu ntego z’umuziki we, aho kuririmba abifata nk’umuhamagaro ugomba gukomeza kugeza ku ndunduro y’ubuzima.

Akorera umuziki kuri YouTube

Manzi Merci afite umuyoboro wa YouTube witwa MANZI MERCI OFFICIAL, aho ashyira indirimbo ze n’ibindi bikorwa bye bya muzika.

Abifuza gukurikirana indirimbo ze no kumenya byinshi ku rugendo rwe rwa muzika bashobora kumukurikira kuri uwo muyoboro.

MINEMBWE CAPITAL NEWS