Pasiteri Eric Nsenga Yaciye Amarenga Akomeye ku Biganiro by’Igihugu Bitegerejwe
MINEMBWE CAPITAL NEWS (MCN)
Mu gihe Repubulika Iharanira Demokarasi ya Congo (RDC) ikomeje gushaka inzira zo kurangiza ikibazo cy’umutekano n’ihungabana rya politiki bimaze imyaka myinshi, Pasiteri Eric Nsenga, umwe mu bahagarariye amadini ari gutegura gahunda y’ibiganiro by’igihugu (Dialogue National), yatangaje ko amadini atazigera yemera kwinjira mu gikorwa cyayatakariza icyubahiro n’icyizere yubakiyeho mu gihugu no ku rwego mpuzamahanga.
Mu kiganiro cyatambutse ku wa Mbere kuri Space Live, Pasiteri Eric Nsenga yasubije ibibazo bitandukanye birebana n’uruhare rw’amadini muri gahunda y’ibiganiro byitezwe guhuza Abanyekongo.
Abajijwe niba Perezida Félix Tshisekedi afite ubushake nyabwo bwo kugeza igihugu ku biganiro bizatanga umusaruro, Pasiteri Eric Nsenga yavuze ko icyo kibazo kiri mu rwego rwa politiki, bityo ko atari inshingano z’abahuza gusuzuma cyangwa kugenzura imigambi y’abanyapolitiki.
Yagize ati:
“Kumenya niba Perezida afite umutima mwiza cyangwa se afite indi migambi ni ikibazo cya politiki. Mu rwego rwa politiki, inyungu n’imibare ni byo biyobora ibyemezo. Kubimenya neza biragoye kuko bishobora guhinduka bitewe n’inyungu z’igihe.”
Yongeyeho ko icyo abahuza bashyize imbere atari ugusesengura imigambi y’umuntu umwe, ahubwo ari ugushyiraho uburyo bwizewe bwo kurinda no gukomeza inzira y’ibiganiro kugira ngo bizagirire akamaro igihugu cyose.
Pasiteri Eric Nsenga yashimangiye ko, n’ubwo Perezida wa Repubulika afite ububasha bwo gutumiza ibiganiro nk’uko Itegeko Nshinga ribimwemerera, ibyo biganiro bidakwiye gufatwa nk’umutungo cyangwa gahunda ya Perezida wenyine.
Yagize ati:
“Perezida afite ububasha bwo gutumiza ibiganiro kuko ari umurinzi w’igihugu nk’uko biteganywa n’Itegeko Nshinga. Ariko ibi ni ibiganiro by’Abanyekongo bose; ni ibyanjye, ibyanyu n’iby’abaturage bose.”
Aya magambo agaragaza ko abategura iyi gahunda bifuza ko ibiganiro bizaba urubuga rwagutse ruhuza Abanyekongo bose, aho buri ruhande ruzabona umwanya wo gutanga ibitekerezo byarwo.
Mu magambo yakuruye cyane ibitekerezo, Pasiteri Eric Nsenga yavuze ko amadini yombi ayoboye iki gikorwa afite izina rikomeye ndetse n’icyizere gikomeye imbere mu gihugu no ku rwego mpuzamahanga, bityo ko adashobora kwemera kwinjira mu nzira ishobora gutesha agaciro umurimo wayo.
Yagize ati:
“Amadini yacu yombi afite icyubahiro n’izina rikomeye mu gihugu no ku rwego mpuzamahanga. Ntitwashobora kwinjira mu gikorwa cyadutesha agaciro cyangwa kikadusenya.”
Yavuze ko kuba amadini yemeye kugira uruhare muri iyi gahunda bisobanura ko habanje gutekerezwa neza, hubahirizwa ubushishozi, ubunyamwuga, kutabogama ndetse n’inshingano zo kuyobora abaturage mu kuri no mu mahoro.
Mu gusoza ubutumwa bwe, Pasiteri Eric Nsenga yavuze ko, n’ubwo ibiganiro bya politiki bifite akamaro, hari ibibazo byimbitse igihugu gifite bidashobora gukemurwa n’abanyapolitiki, igisirikare cyangwa ibihugu by’amahanga.
Yagize ati hari ibibazo:
- Bidashobora gukemurwa n’abanyapolitiki;
- Bidashobora gukemurwa n’igisirikare;
- Bidashobora gukemurwa n’Umuryango w’Abibumbye (ONU);
- Bidashobora gukemurwa n’ibiganiro bibera i Doha cyangwa i Washington.
Yavuze ko ibyo bibazo bisaba no kwitabaza Imana, ashimangira ko RDC ari igihugu gifite abaturage benshi bemera Imana, bityo ko uruhare rw’amasengesho, indangagaciro n’ubwiyunge bushingiye ku kwemera budakwiye kwirengagizwa.
Amagambo ya Pasiteri Eric Nsenga agaragaza ko amadini ashaka kugira uruhare nk’umuhuza wigenga, aho yifuza ko ibiganiro by’igihugu bitaba umushinga wa Leta cyangwa w’ishyaka runaka, ahubwo bikaba inzira ihuza Abanyekongo bose mu gushakira hamwe ibisubizo birambye.
Mu gihe igihugu gikomeje guhura n’ibibazo by’umutekano, amakimbirane ya politiki n’ibibazo by’ubumuntu mu bice bitandukanye, amaso menshi akomeje kureba niba iyi gahunda y’ibiganiro izashobora guhuriza hamwe impande zitavuga rumwe, ikaba intambwe nshya iganisha ku mahoro arambye.
MINEMBWE CAPITAL NEWS (MCN)
