Ubwicanyi muri Mwenga: Abacukuzi b’Amabuye y’Agaciro Barishwe, Abandi Bajyanwa ku Ngufu mu Mashyamba
MINEMBWE CAPITAL NEWS (MCN)
Amakuru aturuka mu gace ka Kalole, gaherereye muri Secteur ya Itombwe, Teritware ya Mwenga, mu Ntara ya Kivu y’Amajyepfo, aravuga ko abantu bari mu bikorwa byo gucukura amabuye y’agaciro bagabweho igitero mu ijoro ryaraye rikeye rishyira kuri uyu wa kabiri n’abarwanyi ba Wazalendo, bamwe bakahasiga ubuzima, mu gihe abandi bajyanywe ku ngufu mu mashyamba.
Nk’uko amakuru yizewe yageze kuri Minembwe Capital News (MCN) abigaragaza, iki gitero cyabaye mu gihe abo bacukuzi bari basanzwe bakora ibikorwa byabo byo gushakisha amabuye y’agaciro muri ako gace ka Kalole.
Abatangabuhamya bavuga ko bamwe mu bacukuzi bishwe ako kanya, mu gihe abandi bafashwe n’abarwanyi maze bajyanwa ahantu hatazwi mu mashyamba. Kugeza ubu, amakuru arambuye ku hazajyanwe abo bantu n’impamvu yatumye bafatwa ntaramenyekana.
MCN ntiramenya umubare nyawo w’abahitanywe n’iki gitero, ariko amakuru atandukanye ava muri ako gace avuga ko abishwe bashobora kuba ari benshi, ndetse hakaba n’abandi benshi bakomeje kuburirwa irengero nyuma yo kujyanwa ku ngufu.
Aya makuru akomeza avuga ko iki gikorwa cyaba cyarakozwe n’abarwanyi ba Wazalendo, bivugwa ko bari bafatanyije n’abarwanyi ba FDLR ndetse n’ingabo z’u Burundi (FDNB). Hari kandi amakuru avuga ko bamwe mu mitwe ya Wazalendo yaba yarakoranye n’Imbonerakure, umutwe w’urubyiruko ushamikiye ku ishyaka riri ku butegetsi mu Burundi.
Nubwo aya makuru akomeje gukurikiranwa, kugeza ubu nta rwego rwa Leta cyangwa urundi rwego rwemewe ruratangaza ku mugaragaro umubare w’abahitanywe n’iki gitero, cyangwa ngo rutange ibisobanuro birambuye ku byabereye i Kalole.
Akarere ka Mwenga, kimwe n’utundi duce two muri Kivu y’Amajyepfo, tumaze igihe tugaragaramo ibikorwa by’imitwe yitwaje intwaro, aho abaturage bakomeje kugaragaza impungenge z’umutekano muke, ubwicanyi, iyicarubozo ndetse n’ingaruka z’imirwano ku buzima bw’abasivili.
Minembwe Capital News (MCN) irakomeza gukurikirana aya makuru no kubagezaho amakuru mashya uko azagenda aboneka.