USA-Iran: Indege 81 Zangiritse, Harimo Izihenze Cyane—CRS Yatangaje Umubare w’Igihombo
Minembwe Capital News (MCN)
Raporo nshya y’Ikigo cy’Ubushakashatsi cya Kongere ya Leta Zunze Ubumwe za Amerika (Congressional Research Service – CRS) igaragaza ko nibura indege 81 z’igisirikare cya Amerika zangiritse kuva ibikorwa bya gisirikare byatangira tariki ya 28/02/2026.
Icyakora, CRS isobanura ko umubare wa 81 udasobanura ko izo ndege zose zangiritse burundu. Raporo ivuga ko hari izashoboye gusanwa zikongera kujya mu mirimo. Raporo kandi ivuga ko uyu mubare ushobora guhinduka uko amakuru mashya akomeza kuboneka.
Mu ndege zangiritse, 45 ni drones zo mu bwoko bwa MQ-9 Reaper, zikaba ari zo zigize umubare munini w’ibyangiritse.
MQ-9 Reaper ikoreshwa mu butasi, gukurikirana ibikorwa bya gisirikare no kugaba ibitero. Amakuru CRS yakusanyije avuga ko Amerika yatakaje nibura izo ndege 45 mu bikorwa byayo byo kurwanya Iran.
Raporo igaragaza ko F-15E Strike Eagle 12 ziri mu ndege zibarwa muri ibyo bihombo.
Ku itariki ya 02/03/2026, F-15E zitatu zangijwe n’amasasu y’ingabo z’inshuti mu kirere cya Kuwait. Ku itariki ya 05/04/2026, indi F-15E yarashwe nyuma yo kugwa muri Iran.
Ikindi gikomeye cyabaye ku itariki ya 09 n’iya 10/09/2026, ubwo ibitero bya Iran byangije byoroheje F-15E umunani zari ku birindiro bya Muwaffaq Salti Air Base muri Jordan. Izo ndege zaje gusanwa zisubira mu kazi.
Mu ndege zihenze kandi zikomeye cyane za Amerika, F-35A Lightning II imwe iri muri raporo.
CRS ivuga ko ku itariki ya 19/03/2026, F-35A imwe yangijwe n’amasasu y’ingabo zo ku butaka za Iran ubwo yari hejuru ya Iran.
Indi ndege ikomeye ni E-3 Sentry, ikoreshwa mu kugenzura ikirere, gutahura indege ziri kure no guhuza ibikorwa by’indege za gisirikare.
Iyo ndege yangijwe ku birindiro bya Prince Sultan Air Base muri Saudi Arabia mu gitero cya Iran. CRS ivuga ko nyuma yaje gutangazwa ko iyo ndege yari yakubiswe ku buryo butaziguye.
Raporo ivuga kandi ko KC-135 Stratotanker zirindwi ziri mu ndege zangiritse bikomeye.
Mu kwezi kwa gatatu, indege zibiri za KC-135 zagize ikibazo; imwe yaguye muri Iraq, abakozi bayo batandatu bose barapfa, mu gihe indi yakoze impanuka.
Ku rundi ruhande, KC-135 zitanu zangijwe n’igitero cya Iran ubwo zari hasi ku birindiro bya Prince Sultan Air Base muri Saudi Arabia.
Ubwoko bw’indege n’umubare w’izangiritse
Ubwoko bw’indege| Umubare wangijwe burundu ni
MQ-9 Reaper| 45
F-15E Strike Eagle| 12
KC-135 Stratotanker| 7
AH-6 Little Bird| 4
MQ-1| 3
A-10 Thunderbolt II| 2
MC-130J Commando II| 2
F-35A Lightning II| 1
E-3 Sentry| 1
HH-60W Jolly Green II| 1
MQ-4C Triton| 1
AH-64 Apache| 1
MH-60 Sea Hawk| 1
Igiteranyo| 81
Iyi mibare ikubiyemo indege zasenywe, izangijwe ndetse n’izangijwe mu bindi bikorwa byo mu ntambara; si ukuvuga ko zose zasenyutse burundu.
Raporo ya CRS igaragaza ko uburyo indege z’Amerika zangijwe butandukanye. Zimwe zarashwe n’ingabo za Iran, izindi zangizwa n’ibitero bya misile n’indege zitagira abapilote bya Iran ku birindiro by’Amerika, mu gihe izindi zangijwe n’imirwano yo mu kirere.
Urugero rugaragara ni igitero cya Iran cyagabwe ku Muwaffaq Salti Air Base muri Jordan mu kwezi kwa Cyenda, cyangiza F-15E umunani na A-10 imwe. Muri Saudi Arabia, ibitero bya Iran byangije KC-135 zitanu ndetse na E-3 Sentry imwe ku birindiro bya Prince Sultan.
CRS kandi ivuga ko MQ-1 imwe yarashwe na Iran ku itariki ya 31/05/2026, mu gihe andi ma-MQ-1 abiri yangijwe bikomeye nyuma y’ibitero bya Iran byavuzwe mu kwezi kwa Cyenda.
Ni ngombwa gutandukanya igitero cya Iran n’izindi mpamvu zateje igihombo.
F-15E zitatu zangijwe ku itariki ya 02/03/2026 n’amasasu y’ingabo z’inshuti, aho kuba Iran. Indi F-15E yarasenywe iri hejuru y’ikirere cya Iran ku itariki ya 05/04/2026.
Hari kandi KC-135 yaguye muri Iraq, MQ-4C Triton yaguye kubera impanuka, ndetse na kajugujugu zimwe zaburiwe irengero mu bikorwa byo gutabara.
Igihombo gishobora kugera kuri miliyari 3.3 z’amadolari
CRS, ishingiye ku mibare y’Ikigo cya Kongere gishinzwe ingengo y’imari (Congressional Budget Office – CBO), ivuga ko ikiguzi cyo gusimbuza ibikoresho byangijwe kugeza ku itariki ya 01/08/2026 gishobora kuba hagati ya miliyari 1.9 na miliyari 3.3 z’amadolari ya Amerika, bitewe n’uburyo Pentagon yahitamo kubisimbuza.
Ibi bivuze ko umubare wa 81 udakwiye gufatwa nk’aho ari indege 81 zasenyutse burundu cyangwa ko zose zarashwe na Iran. Ni umubare w’indege zangiritse mu bikorwa bya gisirikare by’Amerika bifitanye isano n’intambara na Iran. CRS ivuga kandi ko amakuru ashobora gukomeza kuvugururwa.
Minembwe Capital News (MCN)
