M23 yakubise kubi FARDC n’ingabo z’u Burundi i Masisi.
Umutwe wa M23 urwanya ubutegetsi bwa perezida Félix Tshisekedi mu rugamba wa rwanye kuri uyu wa Gatandatu tariki ya 18/01/2025 mu bice byo muri teritware ya Masisi wahaye isomo rikaze ihuriro ry’Ingabo zirwana ku ruhande rwa Guverinoma ya Kinshasa, rigizwe n’ingabo z’u Burundi, FARDC, FDLR, Wazalendo n’abacanshuro b’Abazungu baturutse mu Burayi.
Amakuru avuga kuri iyi mirwano yabaye hagati ya M23 n’ingabo za Congo n’abambari bazo avuga ko yatangiye igihe c’isaha ya saa kumi nimwe z’igitondo cyo kuri uyu wa Gatandatu.
Ni imirwano yabereye mu duce twinshi duherereye muri teritware ya Masisi, aho yanasize uyu mutwe wa M23 wigaruriye agace ka Bitonga, nyuma y’imirwano ikomeye yahanganishije uriya mutwe n’ihuriro ry’ingabo za RDC ku misozi ihanamiye iyi centre ya Bitonga.
Aya makuru anavuga kandi ko uruhande rwa Leta, ahanini ku ngabo z’u Burundi zi yifasha kurwanya uyu mutwe zakubiswe bikomeye kuko zahatakarije abasirikare babo benshi babarirwa mu mirongo.
Iyi mirwano kandi yavuzwe i Muhemba na Kishonja muri grupema ya Baoba . Bikavugwa ko abarwanyi bo mu mutwe wa M23 ko bakomeje gutera intambwe berekeza i Nyabiondo bagana muri teritware ya Kalehe mu Ntara ya Kivu y’Amajy’epfo.
Ahandi humvikanye ibiturika byinshi ni muri Bitagata ahari ibirindiro bikomeye by’ingabo z’u Burundi zirwana ku ruhande rwa Leta ya Kinshasa, M23 ikaba yanafashe ibyo birindiro ndetse kandi ibifatiramo n’ibikoresho bya gisirikare birimo imbunda n’amasasu.
Iyi mirwano yaberega mu duce two muri teritware ya Masisi yaje ikurikira iyabaye igihe c’isaha ya saa tatu z’ijoro ryaraye rikeye, ikaba yaraberaga ku musozi wa Mambasa muri teritware ya Lubero mu ntara ya Kivu Yaruguru.