AFC/M23 Yashinje FARDC, Ingabo z’u Burundi, Wazalendo na FDLR Gusuka Ibisasu mu Bice Bituwe n’Abaturage

Mu gihe umutekano ukomeje kuzamba mu misozi ya Minembwe no mu bice byinshi byo mu Ntara ya Kivu y’Amajyepfo, ihuriro Alliance Fleuve Congo (AFC/M23) ryatangaje ko ihuriro ry’ingabo rishyigikiye ubutegetsi bwa Kinshasa ryagabye ibitero bikomeye ryifashishije ibisasu n’indege zitagira abapilote (drones) mu bice bituwe cyane n’abaturage, ibintu rivuga ko byateje impungenge zikomeye ku mutekano w’abasivili.

Mu itangazo ryashyizwe ahagaragara na AFC/M23, iri huriro rivuga ko mu ijoro ryo ku wa Gatatu tariki ya 03 rishyira ku wa Kane tariki ya 04 Kamena 2026, hagati ya saa moya z’ijoro na saa kumi n’imwe za mu gitondo, ihuriro ry’ingabo za FARDC rifatanyije n’abo ryita abafatanyabikorwa baryo, barimo ingabo z’u Burundi, imitwe ya Wazalendo ndetse na FDLR, ryagabye ibitero rikoresheje ibisasu biraswa kure, drone za kamikaze ndetse n’indege zo mu bwoko bwa KT-6.

AFC/M23 ivuga ko ibyo bitero byibasiye cyane agace ka Gakenke, Bidegu na Mikenke, hose haherereye hafi ya santere ya Minembwe, ahasanzwe hatuwe n’abaturage benshi. Nk’uko iri huriro ribitangaza, ibisasu byinshi byaguye mu bice bituwe n’abasivili, ibintu rivuga ko bishobora kuba byashyize ubuzima bw’abaturage mu kaga.

Mu butumwa bwayo, AFC/M23 yavuze ko ibyo bitero bigaragaza ubushake bwa Kinshasa bwo gukomeza gukoresha ingufu za gisirikare aho gushaka ibisubizo bya politiki ku bibazo by’umutekano bimaze imyaka myinshi mu burasirazuba bwa Repubulika Iharanira Demokarasi ya Congo.

Iri huriro ryakomeje rivuga ko ibikorwa nk’ibi bishobora kurushaho gukaza umwuka mubi hagati y’impande zihanganye no gushyira abaturage mu bibazo bikomeye birimo guhunga, kubura ibibatunga ndetse no guhungabana mu mitekerereze.

Minembwe ni kamwe mu duce tumaze igihe kirekire twugarijwe n’intambara n’umutekano muke. Muri ako karere hakunze kubera imirwano ihanganishije FARDC n’imitwe itandukanye yitwaje intwaro, harimo abarwanyi ba Wazalendo, ingabo z’u Burundi na FDLR, bakunze kugaba ibitero mu mihana ituwe n’Abanyamulenge aho kurwanya MRDP-Twirwaneho bahanganye na yo, ikaba ivuga ko irwanirira Abanyamulenge n’abandi baturage bose bavuga ko bahohoterwa cyangwa barenganywa.

Mu mezi ashize, ibikorwa bya gisirikare byakajijwe cyane muri Minembwe no mu nkengero zayo, aho uruhande rurwanirira Leta rwakomeje gushinjwa kugaba ibitero no guhungabanya umutekano w’abaturage. Ibyo byatumye abaturage benshi bahunga ingo zabo, bamwe berekeza mu bice bifite umutekano muke, abandi bahungira mu bihugu bituranye.

Mu bice bya Minembwe, MRDP-Twirwaneho ikomeje kuvugwa mu bikorwa byo kwirwanaho muri ako karere. Uyu mutwe uvuga ko ugamije kurinda abaturage b’Abanyamulenge n’imitungo yabo mu gihe uvuga ko bahura n’ibitero bihoraho.

Mu gihe AFC/M23 ikomeje kuvuga ko hari ubufatanye hagati ya FARDC, FDLR, Wazalendo n’ingabo z’u Burundi, ubutegetsi bwa Kinshasa bukomeje guhakana ibyo bushinjwa, buvuga ko ibikorwa bya gisirikare biri gukorwa mu rwego rwo guhangana n’imitwe yitwaje intwaro irwanya Leta.

Abakurikiranira hafi ikibazo cy’umutekano mu burasirazuba bwa Congo bavuga ko gukomeza gukoresha ibisasu biremereye n’indege zitagira abapilote mu bice bituwe bishobora kongera umubare w’abahunga ndetse n’ibibazo by’ubutabazi.

Imiryango iharanira uburenganzira bwa muntu ikomeje gusaba impande zose ziri mu mirwano kubahiriza amategeko mpuzamahanga agenga intambara no kurinda abasivili batagomba kugirwa ibitambo by’amakimbirane ya gisirikare.

Kugeza ubu, nta tangazo rirambuye riratangazwa n’ubuyobozi bwa FARDC ku birego byashyizwe ahagaragara na AFC/M23 ku birebana n’ibi bitero byo muri Minembwe. Gusa amakuru ava muri ako karere agaragaza ko umwuka ukomeje kuba mubi, aho ibikorwa bya gisirikare bikomeje hagati y’impande zihanganye.

Abaturage bo mu duce twa Gakenke, Bidegu na Mikenke bavuga ko bakomeje kuba mu bwoba, mu gihe impande zose zikomeje kwitegura indi mirwano ishobora kurushaho gukaza umutekano muke muri Minembwe no mu bice biyikikije.