Agezweho ku ntambara ihanganishije Israel na Iran ku munsi wayo wa 6.
Indege za Israel 50 zarashe i Tehran kuri uyu munsi ugira uwa gatandatu ibihugu byombi biri guhungana mu buryo budasanzwe.
Amakuru avuga ko uyu munsi Israel yarashe ahantu 20 hakorerwa intwaro za misile n’ahatunganyirizwa iby’ibanze mu gukora intwaro za nucléaire, iharasisha indege zayo 50.
Aya makuru akomeza avuga ko buri ruhande rukora ibitero ku rwabo amasaha y’ijoro nubwo n’igihe cy’amanywa babikora bitaricyane.
Itangazo igisirikare cya Israel cyashyize hanze mu gitondo cyo kuri uyu wa gatatu tariki ya 18/06/2025, rimenyesha ko indege zacyo z’i ntambara 50 ziyobowe n’urwego rw’ubutasi, zarashe ku bikorwa remezo bitandukanye by’igisirare cya Iran.
Ni itangazo ryakomeje rivuga ko yarashe ahari imashini zifashishwa mu kuvangura ibinyabutabire birimo uranium ifasha gukora intwaro kirimbuzi, n’ibisasu bya misile byose bigamije gukorerwa muri iki gihugu cya Iran.
Itangazo ryagize riti: “Iran yarimo irategura uranium yo gukora ibisasu bya misile.”
Ubundi kandi Israel yavuze ko kuri uyu wa gatatu yahanuye drones 10 za Iran.
Hari nyuma y’aho hari amakuru avuga ko Iran iri gutegura kugaba ibitero i Tel Aviv.
Ku rundi ruhande, Iran na yo yateye ibisasu i Tel Aviv, kandi ngo yaharashe inshuro zibiri aho yarimo ikoresha misile zikaze.
Ibiro ntara makuru by’Abongereza, Reuters, byatangaje ko uyu munsi i Tel Aviv humvikanye uguturika kw’intwaro ziremereye cyane.
Ibyatumye Israel ihita imenyesha abatuye mu bice byo mu majy’Epfo y’uburengerazuba bwa Tehran guhunga kuko igisirikare cyayo kirwanira mu kirere giteganya kuhagaba ibitero bikomeye ku bikorwa by’ingabo za Iran.
Umuyobozi w’urwego rw’ubutasi rwa Leta Zunze ubumwe z’Amerika yatangaje ko Iran ari cyo gihugu gifite ibisasu bya misile byinshi mu Burasizuba bwo hagati, ndetse na Iran yahamije ko ibisasu ifite byayifasha guhangana na Israel, Amerika n’ibindi bihugu byashaka kuyitambika.
Hanyuma Iran na yo itangaza ko urugamba ko ariho rugitangira, ari na bwo yahise itera ibisasu bikaze i Tel Aviv.
Umuyobozi mukuru wa Iran, Khmenei Ayatollah, yatangaje ati: “Mu izina rya Haidar, urugamba ruratangiye.”
Ni mu gihe kandi hari ibitangazamakuru byo mu Burasirazuba bwo hagati byatangaje ko Israel ubushobozi bwayo bwo gupfubya misile za Iran buri kugenda bucyogora.
Iran ikaba na yo yatangaje ko ibisasu byayo biremereye byananiye Israel kubihagarika.
CNN yatangaje ko igisirikare cya Amerika kirwanira mu mazi, USA navy, biteganyijwe ko kijyana amato abiri manini atwaye indege z’intambara mu gace Israel iherereyemo.
