Amayobera ku Ifungwa ry’Abanyamulenge Babiri i Bunia: Ukwezi Kurashize Bataramenya Icyo Bashinjwa
Abanyamulenge babiri bakomeje gufungirwa muri Prison Centrale ya Bunia, mu ntara ya Ituri, bakomeje guteza impungenge no kwibaza byinshi, kuko kugeza ubu hataramenyekana impamvu nyakuri y’ifungwa ryabo cyangwa icyaha bashinjwa mu buryo bweruye.
Aba bombi bari mu itsinda ry’Abanyamulenge umunani bafashwe mu ntangiriro z’ukwezi kwa Kamena 2026. Bose bakoraga akazi ko kohereza no kwakira amafaranga bifashishije uburyo bwa M-Pesa mu mujyi wa Bunia.
Icyo gihe, inzego z’umutekano zabafashe zatangaje ko bakekwagaho gukorana n’umutwe wa M23 binyuze mu bikorwa byabo byo kohereza amafaranga. Nyamara, amakuru aturuka hafi y’abo bafashwe avuga ko icyo kirego kidafite ibimenyetso bifatika, ndetse ko nta sano bari bafitanye n’uwo mutwe.
Nyuma yo gufatwa, bose bajyanywe gufungirwa muri kasho y’Ikigo cy’Igihugu gishinzwe Ubutasi (ANR) i Bunia. Mu minsi yakurikiyeho, abantu batandatu bahise barekurwa, hasigara babiri gusa, ari na bo kugeza ubu bakomeje gufungirwa muri Prison Centrale ya Bunia.
Igikomeje guteza urujijo ni uko abo bantu umunani bose bafashwe bashinjwa kimwe, nyamara batandatu bakarekurwa, abandi babiri bagakomeza gufungwa, kandi kugeza ubu hakaba hataratangazwa icyaha cyihariye cyangwa ibimenyetso bifatika bibashinja.
Iri fungwa rikomeje kuvugisha benshi, cyane cyane mu Banyamulenge, bavuga ko rikomeje kongera impungenge ku bibazo bamaze igihe bagaragaza ko bahura na byo muri Repubulika Iharanira Demokarasi ya Congo, birimo gufatwa no gufungwa mu buryo bavuga ko bushingiye ku nkomoko yabo.
Hari abavuga ko ibi byiyongera ku bibazo by’umutekano Abanyamulenge bamaze igihe bagaragaza ko bahura na byo, cyane cyane mu bice bya Minembwe no ku Ndondo, muri Gurupoma ya Bijombo, Teritwari ya Uvira, aho bavuga ko bakomeje kugabwaho ibitero n’ingabo za FARDC, zifatanyije n’ingabo z’u Burundi ndetse n’imitwe ya Wazalendo na FDLR.
Nk’uko amakuru atangwa n’abaturage bo muri ibyo bice abivuga, ibyo bitero byasenye imihana myinshi, bituma abaturage benshi bava mu byabo, mu gihe amatungo arimo inka ibihumbi byinshi na yo bavuga ko yanyazwe.
Abanyamulenge bakomeje gusaba ko hakorwa iperereza ryigenga ku ifungwa ry’aba baturage babiri, bakagezwa imbere y’ubutabera niba hari ibyo bakekwaho, cyangwa se bakarekurwa mu gihe nta bimenyetso bifatika bibashinja bihari.
Hari kandi abemeza ko kutabona ubutabera ari kimwe mu byagize uruhare mu ivuka ry’umutwe wa MRDP-Twirwaneho, bavuga ko washinzwe hagamijwe kurengera abaturage bavuga ko bamaze igihe bahura n’ihohoterwa n’akarengane.
Iyi nkuru ishingiye ku makuru yatanzwe n’abo bireba ndetse n’andi makuru yakusanyijwe. Nta ruhande rurebwa n’ibi birego rwari rwatangaza icyo rubivugaho kugeza igihe iyi nkuru ubwo twayitegurwaga.
