Amerika Yasobanuye Impamvu Igiye Gutanga Pasiporo Zihariye Ziriho Ifoto ya Perezida Trump
Minisiteri y’Ububanyi n’Amahanga ya Leta Zunze Ubumwe za Amerika yatangaje gahunda nshya igamije gusohora pasiporo zidasanzwe zizaba ziriho ifoto ya Perezida Donald Trump, ivuga ko biri mu rwego rwo kwizihiza isabukuru y’imyaka 250 iki gihugu kimaze kibonye ubwigenge.
Aya makuru yatangajwe ejo ku wa 28/04/2026 n’Umuvugizi w’iyi Minisiteri, Tommy Pigott, aho yasobanuye ko izi pasiporo zizatangira gutangwa zimaze gutegurwa neza n’Ikigo gishinzwe gutanga pasiporo kiri i Washington, DC. Yavuze ko zizahabwa cyane cyane abantu basaba kongeresha pasiporo zabo cyangwa abazisaba bwa mbere, mu gihe abakomeza gusaba serivisi hifashishijwe internet cyangwa ibindi bigo basanzwe bazakomeza gukoresha pasiporo zisanzwe.
Iyi gahunda iri mu murongo w’ibikorwa byagutse Amerika iri gutegura byo kwizihiza imyaka 250 ishize ibonye ubwigenge, bwatangajwe tariki ya 04/07/1776. Ni umunsi ufite amateka akomeye cyane muri politiki n’imiterere y’iki gihugu, kuko ari bwo hasinywaga inyandiko ya Declaration of Independence.
Nk’uko byagaragajwe n’amakuru y’ibanze, igifuniko cy’izi pasiporo kizaba kirimo ifoto ya Donald Trump hamwe n’umukono we wanditse mu ibara rya zahabu, bigamije kuyigaragaza nk’inyandiko yihariye ifite agaciro k’amateka. Inyuma yayo hazagaragara ishusho ishingiye ku gishushanyo kizwi cyane cya “Declaration of Independence” cyakozwe n’umunyabugeni John Trumbull, cyerekana abagize uruhare mu gutangaza ubwigenge bwa Amerika.
Ibi bihindura uko pasiporo zisanzwe zigaragara, aho ku gipfukisho cy’imbere hasanzwe hari igishushanyo gishingiye ku murage w’umuco w’iki gihugu.
Minisiteri y’Ububanyi n’Amahanga yagaragaje ko nubwo hazashyirwamo ibishushanyo n’imiterere yihariye, izi pasiporo zizakomeza kuba zifite urwego rwo hejuru rw’umutekano, nk’uko bisanzwe ku byangombwa bya Amerika bifatwa nk’ibyizewe cyane ku isi. Hazakomeza gukoreshwa ikoranabuhanga rigezweho ririmo ibimenyetso by’ibanga (biometric features), ibikoresho birwanya uburiganya n’ubundi buryo bwo kurinda inyandiko.
Biteganyijwe ko izi pasiporo zizatangira gusohoka mu gihe cy’impeshyi (summer) y’uyu mwaka, nubwo umubare wazo utaratangazwa. Amakuru agaragaza ko zizaba nke kandi zigenewe cyane cyane kuzirikana amateka, bityo zikazagira agaciro kihariye haba mu rwego rw’ubutegetsi ndetse no mu mateka y’igihugu.
Iyi gahunda ije yiyongera ku zindi gahunda zo kwizihiza yubile y’imyaka 250, zirimo no gutegura ibiceri byihariye bifite ishusho ya Perezida Trump, byemejwe na komisiyo yihariye y’ubugeni yashyizweho n’ubuyobozi bwe.
Nubwo iyi gahunda ifite intego yo kwizihiza amateka y’igihugu, hari abasesenguzi bagaragaza ko ishobora no guteza impaka ku ruhare rw’umuntu umwe mu bimenyetso by’igihugu, cyane cyane ku byangombwa bifite agaciro mpuzamahanga nka pasiporo. Gusa ku ruhande rwa Leta, ibi bifatwa nk’igikorwa cy’igihe gito kigamije guha agaciro ibihe by’amateka igihugu kirimo kwizihiza.
Muri rusange, Amerika ikomeje kwitegura kwizihiza imyaka 250 y’ubwigenge bwayo mu buryo bwagutse, buhuza amateka, ikoranabuhanga n’ubuhanzi, hagamijwe kugaragaza isura y’igihugu mu bihe bishya.
