Guverinoma ya RDC Yinjiye mu Ivugurura Rikomeye rya Polisi, Biometrie Igiye Guhindura Imicungire y’Abapolisi
MINEMBWE CAPITAL NEWS
Guverinoma ya Repubulika Iharanira Demokarasi ya Congo (RDC) yatangije ku mugaragaro gahunda y’ivugurura rikomeye rigamije kunoza imikorere ya Polisi y’Igihugu (PNC), binyuze mu igenzura ryimbitse ry’abakozi, kubarura umubare nyakuri wabo no kubandikisha hakoreshejwe ikoranabuhanga rya biometrie.
Iyi gahunda yatangajwe ku wa Kane, tariki ya 09/07/2026, mu nama yayobowe na Visi Minisitiri w’Intebe akaba na Minisitiri w’Umutekano w’Imbere mu Gihugu, Jacquemain Shabani, yitabiriwe n’abagize Guverinoma ndetse n’abayobozi batandukanye ba Polisi y’Igihugu.
Imibare yashyizwe ahagaragara muri iyo nama igaragaza ko Polisi y’Igihugu ya Congo ifite abapolisi 168,617, ariko hafi 21% muri bo bafatwa nk’abapolisi badakora akazi cyangwa batakigaragara mu mirimo yabo ya buri munsi. Iyi mibare yateje impungenge ku mikorere no ku micungire y’uru rwego rushinzwe umutekano w’abaturage.
Guverinoma ivuga ko intego nyamukuru y’iki gikorwa ari ukubaka ububiko bwizewe kandi bugezweho bw’amakuru y’abakozi ba Polisi, hagamijwe gukuraho amakemwa amaze igihe avugwa mu micungire y’abakozi, kunoza imiyoborere y’abakozi no kugenzura neza ingengo y’imari ikoreshwa mu mishahara.
Uyu mushinga ushyirwa mu bikorwa na sosiyete Africa Business Agency (ABA) ku bufatanye n’Ishami ry’Ikoranabuhanga rya Komiseriya Rusange ya Polisi y’Igihugu.
Ibikorwa biteganyijwe birimo gusuzuma amakuru asanzwe abitse, kugenzura buri mupolisi ku giti cye, gufata ibimenyetso bya biometrie no kumwandikisha muri gahunda nshya y’ikoranabuhanga izifashishwa mu micungire y’abakozi ba Polisi.
Mu ijambo rye, Jacquemain Shabani yavuze ko iri vugurura ari imwe mu nkingi z’ingenzi zigamije kubaka Polisi ikora kinyamwuga kandi irinda umutekano neza.
Yagize ati:
«”Ubutumwa buduhuza uyu munsi bushingiye ku masezerano Leta yagiranye na Africa Business Agency kugira ngo hashyirweho uburyo bwa biometrie bwo kumenya, kubarura no kwandikisha abapolisi, ndetse n’uburyo bugezweho bwo kubacunga. Nta vugurura ryimbitse rya Polisi ryashoboka tudafite imibare nyayo n’ububiko bwizewe bw’amakuru y’abakozi.”»
Yakomeje ashimangira ko kumenya neza umubare w’abakozi n’aho bakorera ari yo nkingi ya mbere yo gushyiraho politiki inoze yo gucunga umutungo wa muntu muri Polisi.
Minisitiri w’Umutekano w’Imbere mu Gihugu yavuze kandi ko ishyirwa mu bikorwa ry’iyi gahunda mu ntara zose uko ari 26 zigize RDC risaba ubushobozi bw’amafaranga butari buke.
Yagaragaje ko ari yo mpamvu yatumiye muri iyo nama Minisitiri w’Ingengo y’Imari na Minisitiri w’Imari kugira ngo haboneke uburyo bwo gutanga amafaranga akenewe mu gutwara ibikoresho, kugura ibikoresho byifashishwa muri biometrie, kubicunga no kubisana igihe bibaye ngombwa.
Yashimangiye ko gutsinda kw’uyu mushinga bizashingira ku gutangwa ku gihe kw’amafaranga yose awukenewe.
Perezida w’Inama y’Ubutegetsi ya Africa Business Agency, Claude Kikoka Mbala, yavuze ko ibikorwa bizakorwa mu gihugu hose mu gihe cy’amezi atandatu, bikazagera ku bapolisi bagera ku 157,000.
Yasobanuye ko nyuma yo kurangiza uyu mushinga, buri mupolisi azaba afite umwirondoro umwe rukumbi uzwi n’amategeko, hamwe n’umwirondoro wa biometrie wemejwe nyuma yo kugaragara ku mubiri.
Yongeyeho ko aho buri mupolisi akorera hazemezwa n’abayobozi be, kandi hakazajya habikwa ibimenyetso bya buri gikorwa cyose cyo kugenzura, kugira ngo habeho gukurikirana neza imikorere y’abakozi no gukumira uburiganya.
Abasesenguzi bavuga ko iri vugurura rishobora kuba intambwe ikomeye mu guhangana n’ikibazo cy’abakozi b’impimbano, abamaze igihe badafite ibikorwa bifatika, ndetse n’ibibazo bimaze imyaka bivugwa mu micungire y’imishahara ya Polisi.
Biteganyijwe ko nyuma yo kurangiza iyi gahunda, Guverinoma izaba ifite imibare yizewe y’abapolisi bakorera igihugu, bityo bigafasha mu kunoza igenamigambi, imicungire y’umutungo wa Leta no kongera imikorere myiza y’uru rwego rushinzwe kurinda umutekano w’abaturage.
Nubwo iyi gahunda itegerejweho gutanga umusaruro mu miyoborere ya Polisi y’Igihugu, hari abakurikiranira hafi ibijyanye n’imiyoborere ya Leta bavuga ko intsinzi yayo izaterwa n’uko izashyirwa mu bikorwa mu mucyo, nta vangura, kandi hubahirizwa amategeko n’amahame y’imicungire myiza y’inzego za Leta.
