Hamenyekanye Impamvu Itumanaho Ryahagaritswe i Baraka no Mu Nkengero Zayo; Byafashwe Nyuma y’Ibihombo Bikomeye FARDC Yagize ku Rugamba
Amakuru yizewe Minembwe Capital News yabonye agaragaza ko ubuyobozi bw’Ingabo za Repubulika Iharanira Demokarasi ya Congo (FARDC) bwatanze amabwiriza yo guhagarika itumanaho rikoresha iminara ya telefoni mu bice bimwe bya Teritwari ya Fizi, birimo Baraka, Bibogobogo, Rusuku n’utundi duce duhana imbibi na byo.
Aya mabwiriza yatangiye gushyirwa mu bikorwa mu ijoro ryo ku wa Kane, nyuma y’imirwano ikomeye yabereye mu gace ka Rwitsankuku, aho MRDP-Twirwaneho ifatanyije na M23 birukanye ihuriro ry’ingabo za Repubulika Iharanira Demokarasi ya Congo, ririmo FARDC, ingabo z’u Burundi, imitwe ya Wazalendo na FDLR.
Ibi bibaye nyuma y’aho MRDP-Twirwaneho na M23 bakomeje kwagura ibice bagenzura mu misozi ya Minembwe, aho bafashe imihana irimo Kalingi, Bidegu, Kalongi, Gakenke n’ahandi. Banatangaje kandi ko bamaze kwigarurira agace ka Mikenke, gaherereye muri Secteur ya Itombwe, Teritwari ya Mwenga, mbere yo gukomeza berekeza kuri Rwitsankuku no gufata Point Zero ku wa Gatandatu w’icyumweru gishize.
Amakuru Minembwe Capital News yakusanyije avuga ko, nyuma yo kuva muri Rwitsankuku ku mugoroba wo ku wa Gatanu, ihuriro rya FARDC n’abafatanyabikorwa baryo ryasubiye inyuma nyuma y’ibitero byavugwaga ko byaturukaga mu kirere. Ku wa Gatandatu, MRDP-Twirwaneho na M23 batangaje ko bageze kuri Point Zero, mu gihe ingabo zari zihasanzwe zari zamaze kuhava umunsi wabanje.
Point Zero yafatwaga nk’imwe mu birindiro bikomeye by’ihuriro rya FARDC muri ako karere. Nyuma yo kuyivamo, amakuru avuga ko bamwe mu basirikare berekeje mu gace ka Mulima, mbere yo gukomeza basubira inyuma berekeza mu bice bigana i Baraka.
Nk’uko amakuru Minembwe Capital News ivuga ko yizewe abigaragaza, icyemezo cyo guhagarika itumanaho muri Fizi cyafashwe muri uwo mujyo w’imirwano n’isubira inyuma ry’ingabo za Leta. Aya makuru avuga ko icyo cyemezo kigamije kugabanya ikwirakwizwa ry’amakuru yerekeye uko ibikorwa bya gisirikare byari byifashe muri ako gace.
Amakuru akomeza avuga ko abasirikare bakomeretse n’abatarakomereka bakomeje kuva mu bice bitandukanye birimo Mulima, Nakiheli, Kilumbi, Rusuku n’ahandi, berekeza mu duce dufatwa nk’ufite umutekano kurushaho.
Iyi ntambwe yo guhagarika itumanaho ije mu gihe umutekano ukomeje guhindagurika mu bice byinshi bya Teritwari za Fizi na Mwenga, aho imirwano hagati y’impande zihanganye ikomeje gutuma abaturage benshi bava mu byabo, mu gihe hakomeje gukurikiranwa uko ibintu bikomeza guhinduka ku rugamba.
