I Lulenge mu Rujijo: Ikibuga cya Drones Cyimuwe mu Kabanju, Gisanya Iza mu Ishusho!
Minembwe Capital News (MCN)
Minembwe Capital News (MCN) yamenye amakuru akomeye agaragaza ko ikibuga cy’indege zitagira abapilote zizwi nka drones, cyakoreshwaga n’ihuriro ry’ingabo zirimo iza Repubulika Iharanira Demokarasi ya Congo (FARDC), iz’u Burundi, imitwe ya Wazalendo na FDLR, hamwe n’abacanshuro, cyimuwe kivuye mu Kabanju gishyirwa ahitwa i Gisanya.
Amakuru MCN ifite agaragaza ko iki kibuga cyimuwe hagati muri iki cyumweru turimo. Icyo cyemezo cyafashwe mu gihe, nk’uko ayo makuru abivuga, drones zakoreshwaga mu kugaba ibitero ku bice bitandukanye zahagurukiraga mu Kabanju. Kwimura iki kibuga bikaba byarakozwe mu rwego rwo kujijisha.
Gisanya iherereye hafi cyane ya Kabanju. Ibi bice byombi biherereye muri Secteur y’i Lulenge, muri Teritwari ya Fizi, mu Ntara ya Kivu y’Amajyepfo, mu burasirazuba bwa Repubulika Iharanira Demokarasi ya Congo.
Nk’uko amakuru Minembwe Capital News yamenye abigaragaza, izo drones zahagurukaga mu gace ka Kabanju, zikanyura mu kirere cy’ahitwa Nzovu, hanyuma zigakomeza kugaba ibitero by’ibisasu mu bice bitandukanye.
Mu duce twavuzwe ko twibasiwe n’ibi bitero harimo Gipimo, Gihuha, Nyagishasha n’ahandi.
Kwimura iki kibuga cy’indege zitagira abapilote bije mu gihe ibikorwa by’izi ndege bikomeje kugarukwaho mu makuru ajyanye n’umutekano w’uduce two muri Lulenge no mu bice biyikikije.
Uko umutekano wari umeze
Nubwo ejo hashize haranzwe n’ibitero by’ibisasu byarashwe na drones, umwe mu basirikare ba MRDP-Twirwaneho yabwiye MCN ko uyu munsi, ku wa gatanu, waranzwe n’ituze.
Minembwe Capital News (MCN)
