Ibisubizo Bitangaje Perezida w’u Burundi Évariste Ndayishimiye Yatanze ku Byo Yagejeje ku Gihugu n’Abarundi mu Myaka Itandatu Amaze ku Butegetsi
MINEMBWE CAPITAL NEWS
Perezida w’u Burundi, Évariste Ndayishimiye, umaze imyaka itandatu ayobora igihugu kuva muri Kamena 2020, yagiranye ikiganiro na BBC cyari kigamije gusubiza ibibazo birebana n’ibyo ubutegetsi bwe bumaze kugeraho muri iyo myaka. Icyakora, ibisubizo yatanze byakuruye impaka ku mbuga nkoranyambaga no mu bakurikiranye icyo kiganiro.
Mu ntangiriro z’ikiganiro, umunyamakuru yamusabye kugaragaza ibyo ubuyobozi bwe bwagejeje ku gihugu n’Abarundi muri manda amazeho. Aho kwibanda ku bikorwa bya Leta cyangwa gahunda z’iterambere igihugu cyagezeho, Perezida Ndayishimiye yamaze umwanya munini avuga ku bikorwa bye bwite, cyane cyane ibijyanye n’ubuhinzi n’ubworozi akorera ku mitungo ye.
Mu bisubizo bye, yavuze ko iwe ku giti cye yohereza ku isoko buri kwezi inyama z’inkwavu zingana na toni imwe. Yanahamagarariye Abarundi badafite akazi kujya gukora mu mirima ye iri mu ntara za Karusi, Gitega na Ruyigi, agaragaza ko ari ho babonera akazi aho gukomeza kuvuga ko nta mirimo ihari.
Perezida Ndayishimiye yongeye kandi kuvuga ko ikibazo cy’ubushomeri mu rubyiruko kitakiriho nk’uko cyari kiri mbere y’uko ajya ku butegetsi. Yavuze ko bamwe mu bajya gushaka akazi mu bindi bihugu baba badashaka gukora imirimo iboneka imbere mu Burundi, anibaza impamvu hari abemera guhinga muri Tanzania ariko ntibemere gukora mu mirima iri mu Burundi.
Mu kindi kibazo, umunyamakuru Cyriaque Muhawenayo yamwibukije amagambo yari yatangaje mu mwaka wa 2022, aho yari yavuze ko ikibazo cy’ibura ry’ibikomoka kuri peteroli yagifashe mu maboko kandi ko kitazongera kubaho. Perezida Ndayishimiye asubiza yemeye ko icyo kibazo kigikomeje kubaho, agira ati: “Ubu ndatomboye, ariko sindi jyenyine.”
Abakurikiranye icyo kiganiro bagaragaje ibitekerezo bitandukanye. Hari abavuze ko bari biteze kumva ibisobanuro birambuye ku bikorwa bya Leta byagezweho mu myaka itandatu ishize, mu gihe abandi babonye ko Perezida yibanze cyane ku rugero rw’ibyo amaze kugeraho ku giti cye no ku bikorwa bye bwite.
Minembwe Capital News
