Ijoro ry’Ubwoba muri Mulongwe na Kitundu: Amasasu Atunguranye Yateje Impagarara
Mu ijoro ryo ku wa Gatatu, tariki ya 17/06/2026, abaturage bo mu bice bitandukanye byo muri Komini ya Mulongwe, cyane cyane mu duce twa Kasenga, Kakombe ndetse no mu gace ka Kitundu, batangaje ko bumvise urusaku rw’amasasu menshi rwumvikanye mu masaha y’ijoro.
Nk’uko amakuru y’ibanze aturuka kuri abo baturage abivuga, ayo masasu yatangiye kumvikana ahagana saa tatu z’ijoro, bitera impungenge n’ubwoba mu miryango myinshi yo muri ibyo bice. Kugeza ubu, impamvu y’ayo masasu ndetse n’abayarashe ntibiramenyekana ku buryo bwemewe n’inzego zibishinzwe.
Mu Burasirazuba bwa Repubulika Iharanira Demokarasi ya Congo, ikibazo cy’umutekano gikomeje kuba kimwe mu bibazo bikomeye bibangamiye imibereho y’abaturage. Mu bice bitandukanye by’intara za Kivu y’Amajyepfo na Kivu y’Amajyaruguru, abaturage bakunze gutangaza ko bahura n’ibibazo by’umutekano muke birimo ubujura bwitwaje intwaro, gusahura imitungo, ibikorwa by’ubwambuzi, ndetse rimwe na rimwe hakagaragara n’ibikorwa byo gushimuta abantu.
Abakurikirana ibibazo by’umutekano bavuga ko iyo amasasu yumvikanye mu duce dutuwemo n’abaturage benshi, abantu bahita bagira ubwoba bwo kuva mu ngo zabo, ibikorwa by’ubucuruzi bigahagarara by’agateganyo, ndetse n’ubuzima busanzwe bugahungabana.
Mu buhamya butandukanye bwagiye butangwa n’abaturage bo mu bice byugarijwe n’umutekano muke, bamwe bavuga ko ibikorwa byo guhungabanya umutekano bikunze gushinjwa impande zitandukanye, zirimo imitwe yitwaje intwaro ikorera muri ako karere ndetse rimwe na rimwe hakavugwa n’inzego z’umutekano zikorera muri iyo zone. Ibyo birego akenshi bisaba iperereza ryigenga kugira ngo hamenyekane ukuri kwabyo. Ariko abaturage bagahamya ko ababiri inyuma ari Wazalendo, FDLR n’ingabo za FARDC, ndetse n’ingabo z’u Burundi.
Ni muri urwo rwego, abaturage bakomeje gusaba inzego zose zifite aho zihuriye n’umutekano kubahiriza amategeko mpuzamahanga arengera abasivili, no kwirinda ibikorwa byose bishobora gushyira ubuzima bw’abaturage mu kaga.
Abaturage benshi bo mu Burasirazuba bwa Congo bakomeje kugaragaza ko icyifuzo cyabo gikomeye ari ukubona amahoro arambye, umutekano usesuye ndetse n’ubuyobozi bushobora kubaka icyizere hagati y’abaturage n’inzego zibayobora. Benshi bagahamya kandi ko abari mu bice bigenzurwa na MRDP-Twirwaneho na M23 bagira umwidegembyo n’umutekano utandukanye n’ibice bigenzurwa n’ihuriro ry’ingabo za Repubulika Iharanira Demokarasi ya Congo rigizwe n’ingabo za FARDC, ingabo z’u Burundi, n’imitwe ya Wazalendo na FDLR.
Muri ibi bihe akarere gakomeje kugaragaramo intambara n’ubushyamirane, abaturage bavuga ko igikenewe cyane ari ibiganiro bya politiki, ubwiyunge n’ubufatanye hagati y’impande zose bireba, hagamijwe gushaka umuti urambye w’ibibazo bimaze imyaka myinshi byugarije igihugu.
Kugeza ubwo iyi nkuru yandikwaga, nta rwego rwa gisirikare cyangwa urw’umutekano rwari rwagira icyo rutangaza ku mugaragaro ku cyateye urusaku rw’amasasu rwumvikanye muri Mulongwe na Kitundu.
