Kinshasa: Inkongi Ikomeye Yatwitse Rumwe mu Nsengero Zikomeye zo muri Uyu Mujyi
Mu mujyi wa Kinshasa, umurwa mukuru wa Repubulika Iharanira Demokarasi ya Congo (RDC), havuzwe inkuru y’inkongi y’umuriro yibasiye urusengero rwa Shekinah Tabernacle mu gitondo cyo kuri iki Cyumweru tariki ya 17/05/2026.
Iyi nkongi yadutse ahagana saa kumi n’imwe za mu gitondo (05h00), mu gace ka Debonhomme kari ku muhanda munini wa Boulevard Lumumba, umwe mu mihanda ikomeye kandi inyuramo abantu benshi mu mujyi wa Kinshasa. Uru rusengero ruyoborwa na Pasiteri Richard Diyoka Nsanguluja, uzwi cyane mu bikorwa by’ivugabutumwa, kandi urusengero rwe rwitabirwa n’abakirisitu benshi baturuka mu bice bitandukanye by’umujyi wa Kinshasa.
Amakuru aturuka aho byabereye avuga ko umuriro watangiye gukwira mu nyubako z’urusengero mu buryo bwihuse cyane, bituma ibice byinshi byarwo byangirika mbere y’uko ubutabazi bugera aho ikibazo cyari kiri. Abaturage bo muri ako gace ndetse n’abakirisitu bamwe bari begereye urusengero bagerageje gutabara bakoresheje uburyo bw’ibanze, ariko umuriro wari ukaze cyane ku buryo bitashobotse kuwuzimya.
Nubwo inyubako yangiritse bikomeye, amakuru yemeza ko nta muntu wahitanywe n’iyi nkongi cyangwa ngo hagire abakomereka bikabije, kubera ko yabaye mbere y’uko ibikorwa by’amateraniro yo ku Cyumweru bitangira. Ibi byafashwe nk’amahirwe akomeye, kuko uru rusengero rusanzwe rwakira imbaga y’abakirisitu benshi, cyane cyane ku minsi y’amateraniro n’amasengesho rusange.
Kugeza ubu, icyateye iyi nkongi ntikiramenyekana neza. Abashinzwe umutekano n’inzego z’ubutabazi batangaje ko hatangiye iperereza rigamije kumenya inkomoko y’uyu muriro. Hari gukekwa ibintu bitandukanye birimo ikibazo cy’amashanyarazi cyangwa ibindi bikoresho bishobora kuba byateje ubushyuhe bukabije imbere mu nyubako.
Shekinah Tabernacle ni rumwe mu matorero azwi cyane muri Kinshasa, cyane cyane mu gace ka Debonhomme, aho rusanzwe rukorerwamo ibikorwa byinshi by’amasengesho, inyigisho za Bibiliya ndetse n’ibikorwa bigamije guteza imbere imibereho y’umuryango mugari. Inkongi yibasiye uru rusengero yateje agahinda n’ihungabana mu bakirisitu ndetse no mu baturage bahaturiye, benshi bagaragaza ko ari igihombo gikomeye ku muryango mugari wa gikristo muri ako gace.
Abayobozi b’itorero kugeza ubu ntibaratangaza agaciro k’ibyangiritse, ariko amakuru y’ibanze agaragaza ko ibikoresho byinshi byifashishwaga mu bikorwa byo gusenga, birimo ibyuma by’amajwi, intebe ndetse n’ibindi bikoresho byo mu rusengero, byahiye birakongoka.
