Maj. Gen. Sultani Makenga Yashimangiye Urugamba rwo “Kubohora RDC”, Anagaragaza Umurongo Wabo
Mu gihe ibibazo bya politiki n’umutekano bikomeje kuzamba muri Repubulika Iharanira Demokarasi ya Congo (RDC), Umugaba Mukuru w’ihuriro Alliance Fleuve Congo (AFC/M23), Sultani Makenga, yongeye gutangaza ko nta gahunda bafite yo gusubira inyuma mu rugamba bavuga ko rugamije “kubohora igihugu.”
Ibi yabivugiye mu kigo cy’amahugurwa cya Kanombe giherereye muri Teritwari ya Rutshuru ku munsi w’ejo, tariki ya 30/04/2026, ubwo iri huriro ryari rimaze kurangiza icyiciro cya kabiri cy’amahugurwa cyahabwaga abayobozi bo mu nzego z’ibanze bakorera mu bice rigenzura.
Mu ijambo rye, Maj. Gen. Makenga yanenze bikomeye ubuyobozi bwa Leta ya Kinshasa, ayishinja kuba yarangije igihugu binyuze mu miyoborere mibi, ruswa n’ivangura.
Yagize ati:
“Igihugu cyacu cyarangiritse, cyangijwe na Leta ya Kinshasa n’abanyapolitiki bashyize inda zabo imbere, bamunzwe n’ivangura, basenye igihugu cyacu; mwarahunze bitewe n’aba bantu b’i Kinshasa.”
Yakomeje ashimangira ko AFC/M23 itazigera isubira inyuma, ahubwo izakomeza urugamba kugeza igeze ku ntego yayo:
“Urugendo rwo kubohora igihugu cyacu ntiruzasubira inyuma. Turizeza ko tuzakomeza tujye imbere kugeza intego igezweho.”
Yanahaye umukoro abayobozi bahuguwe, abasaba kujya gushishikariza abaturage gukomeza ibikorwa by’ubukungu no kudahungabanywa n’intambara:
“Mugende mubwire abaturage batuze, bahinge, borore, bacuruze, ntibahangayike.”
Mu rwego rwo gushaka guhindura imiterere y’umutekano mu burasirazuba bwa RDC, Makenga yasabye Abanye-Congo bakorana n’umutwe wa FDLR kwitandukanya na wo.
Yavuze ko abarwanyi b’uwo mutwe bakomoka ku Nterahamwe bakwiye gusubira mu Rwanda, mu gihe Abanye-Congo bakwiye gufatanya n’abandi kubaka igihugu cyabo:
“Izo Nterahamwe zisubire iwabo, Abakongomani batahe, bafatanye n’abandi kubaka igihugu. Abo ni abavandimwe, ni abana banyu, ni bagenzi banyu.”
Yanavuze ko abashaka kwinjira mu gisirikare cy’uyu mutwe bazahabwa amahugurwa, mu gihe abifuza gusubira iwabo bazoroherezwa.
Makenga yagaragaje ko ubutegetsi bwa Perezida Félix Tshisekedi budashobora kumva ibiganiro bya politiki, ahubwo ko bwumva imbaraga gusa.
“Tshisekedi n’abo bakorana nta kindi bumva keretse imbaraga.”
Ibi byashimangiye umurongo w’uyu mutwe wo gukomeza urugamba rwa gisirikare nk’inzira nyamukuru yo kugera ku mpinduka bashaka muri RDC.
Umutwe wa M23 watangiye kugaragara cyane mu 2012, uvuga ko uharanira uburenganzira bw’Abanye-Congo bavuga Ikinyarwanda, cyane cyane abo mu bwoko bw’Abatutsi bavuga ko bahohoterwa n’ubutegetsi bwa Kinshasa.
Nyuma yo gutsindwa mu 2013, abarwanyi ba M23 bahungiye mu bihugu bituranye, ariko mu 2021 bongeye kubura bagaragara mu mirwano ikomeye mu Ntara ya Kivu y’Amajyaruguru.
Mu bihe bya vuba, M23 yishyize hamwe n’ihuriro rya politiki n’igisirikare rizwi nka Alliance Fleuve Congo (AFC), rigamije guhuza imitwe itandukanye ihanganye na Leta ya Kinshasa.
AFC/M23 igaragaza ko ifite intego zirimo:
- Guhindura imiyoborere ya RDC ishingiye ku butegetsi buharanira inyungu z’abaturage bose
- Kurwanya ivangura n’akarengane bavuga ko bikorwa n’ubutegetsi bwa Kinshasa
- Gushyiraho inzego z’imiyoborere zegereye abaturage mu bice igenzura
- Gushaka umutekano urambye mu burasirazuba bwa RDC
Ijambo rya Maj. Gen. Makenga rije mu gihe intambara mu burasirazuba bwa RDC ikomeje gufata indi ntera, aho AFC/M23 ikomeza kwigarurira ibice bimwe na bimwe, mu gihe Leta ya Kinshasa nayo ikomeje gushaka uburyo bwo kuyihashya, haba mu buryo bwa gisirikare n’ubwa dipolomasi.
Ibi bituma ejo hazaza h’iki gihugu gikomeza kuba mu gihirahiro hagati y’imbaraga za gisirikare, ibiganiro bya politiki, n’inyungu z’ibihugu byo mu karere.
Ubutumwa bwa Maj. Gen. Sultani Makenga bushimangira ko AFC/M23 yiyemeje gukomeza urugamba nta gusubira inyuma, mu gihe ibibazo bya RDC bikomeje gusaba ibisubizo birambye—byaba ibishingiye ku mbaraga za gisirikare cyangwa ibiganiro bya politiki.
