Menya Ukuri ku Mubare w’Abasirikare Bivugwa ko Bahasize Ubuzima mu Mirwano yo mu Minembwe: Amakuru Atangaje
Amakuru aturuka mu bice bitandukanye bya Minembwe aravuga ko imirwano yamaze icyumweru kirenga, yahuje ingabo za FARDC, iz’u Burundi ndetse n’imitwe ya Wazalendo ku ruhande rumwe, na MRDP-Twirwaneho ku rundi ruhande, yasize igihombo gikomeye ku ruhande rw’ingabo z’u Burundi n’iza FARDC. Aya makuru avuga ko icyo gihombo cyagaragaye cyane cyane ku ngabo z’u Burundi, aho bivugwa ko zatakaje abasirikare 578.
Nubwo aya makuru ataratangazwa cyangwa ngo yemezwe n’inzego z’ubuyobozi ku mpande zose zirebwa n’iyi mirwano, bamwe mu baturage ndetse n’abakurikirana iby’iyi ntambara bavuga ko hari abasirikare benshi bahasize ubuzima, ibintu bikomeje guteza impaka n’impungenge mu baturage.
Umwe mu basirikare ba MRDP-Twirwaneho, utashatse ko amazina ye atangazwa, yagize ati:
“FARDC, ingabo z’u Burundi n’imitwe ya Wazalendo barakubiswe cyane kandi mu buryo butangaje. Erega n’umusaza wenyine yari yahagurukiye guhangana n’umwanzi wari wugarije Minembwe. Uwo musaza ni Général Charles Sematama, umugaba mukuru w’ingabo za MRDP-Twirwaneho.”
Yakomeje avuga ko ingabo z’u Burundi zari zahagurutse zigamije kugenzura cyangwa gufata Minembwe, ariko ko zahahuriye n’uruva gusenya, zikahava zitsinzwe bikomeye.
Uyu musirikare wa MRDP-Twirwaneho yavuze ko yiboneye imirambo y’abasirikare b’u Burundi 578, ndetse akavuga ko umubare w’abapfuye ushobora kuba urenze uwo. Yavuze ko abo basirikare bapfiriye muri iyi mirwano yamaze icyumweru kirenga.
Icyakora, aya makuru yatanzwe n’uyu musirikare ntarashimangirwa n’inzego zemewe, bityo akaba akwiye gufatwa no gusesengurwa mu bwitonzi kugeza igihe hazatangazwa raporo yemewe ku byabereye muri iyi mirwano yamaze icyumweru kirenga ibera mu Minembwe, mu Burasirazuba bwa Repubulika Iharanira Demokarasi ya Congo.
Amakuru aturuka muri ako gace kandi avuga ko iyi mirwano yasize ingabo za FARDC n’abo bafatanyije ibikorwa bya gisirikare basubiye inyuma berekeza ahazwi nka Point Zéro ndetse no kwa Mulima. Kuri ubu, nk’uko ayo makuru abivuga, Minembwe igenzurwa na MRDP-Twirwaneho, umutwe urwanirira abaturage b’Abanyamulenge.
Ibi ni bimwe mu bikomeje gutuma Abanyamulenge benshi bagaragaza ibyishimo, haba abari muri Minembwe ndetse n’abari mu mahanga. Gusa, uko amakuru aturuka ku ruhande rumwe rw’imirwano agenda atangazwa, ni ko hakomeje gutegerezwa ibyatangazwa n’izindi nzego kugira ngo haboneke ishusho yuzuye kandi yizewe y’ibyabereye muri iyi mirwano.
