RDC: Guverinoma Yemeje ko AFC/M23 na MRDP-Twirwaneho Batazitabira Ibiganiro by’Igihugu, Ese Bizatanga Umusaruro?
MINEMBWE CAPITAL NEWS (MCN)
Guverinoma ya Repubulika Iharanira Demokarasi ya Congo (RDC) yatangaje ko ibiganiro by’igihugu biteganyijwe mu rwego rwo kuganira ku hazaza h’igihugu no kuvugurura imiyoborere bitazitabirwa n’ihuriro Alliance Fleuve Congo (AFC/M23) ndetse na MRDP-Twirwaneho.
Aya makuru yatangajwe na Guverinoma, ivuga ko ibyo biganiro bizabera ku butaka bwa RDC kandi bikazakorwa hakurikijwe umurongo washyizweho na Perezida Félix Tshisekedi. Yavuze kandi ko bizashingira ku ngero z’Inama Nkuru y’Igihugu (Conférence Nationale Souveraine), aho kutazashingira ku masezerano ya Sun City.
Guverinoma yanavuze ko idafite impamvu yo kwakira imitwe iyirwanya muri ibyo biganiro. Yongeyeho ko imyanzuro izabivamo itazatangira gushyirwa mu bikorwa mbere y’uko manda iriho ya Perezida Félix Tshisekedi irangira mu mwaka wa 2029.
Nyuma y’aho, abaturage bazahamagarirwa kwitabira referandumu kugira ngo hemezwe Itegeko Nshinga rishya, mbere y’igihe cy’inzibacyuho kizategura amatora mashya no gushyiraho inzego nshya z’ubutegetsi.
Abakurikirana ibibera muri RDC bavuga ko icyemezo cyo kudatumira AFC/M23 na MRDP-Twirwaneho gishobora gukomeza guteza impaka ku musaruro ibyo biganiro bizatanga.
Babishingira ku kuba iyo mitwe imaze igihe igaragaza ko abaturage bo mu Burasirazuba bwa Repubulika Iharanira Demokarasi ya Congo bahura n’ihohoterwa n’akarengane bikomoka ku butegetsi buriho, kandi ikavuga ko ari byo byatumye ifata intwaro.
Ku rundi ruhande, Guverinoma ya RDC ikomeje gufata AFC/M23 nk’umutwe witwaje intwaro udakwiriye kwitabira ibiganiro by’imbere mu gihugu. Ivuga ko ibibazo birebana nawo biri gukurikiranwa binyuze mu zindi nzira z’ibiganiro, zirimo ibiganiro bya Doha.
Hari kandi abasesenguzi bagaragaza ko AFC/M23 n’abo bafatanyije, barimo MRDP-Twirwaneho, bakomeje kugenzura ibice bitandukanye byo mu Burasirazuba bwa RDC. Bityo, kuba abo bireba mu buryo butaziguye batari mu biganiro by’imbere mu gihugu bishobora gutuma imyanzuro izabivamo igorana gushyirwa mu bikorwa muri utwo duce, cyane cyane ku bibazo by’umutekano, imiyoborere n’icyizere hagati y’impande zihanganye.
Abandi na bo bavuga ko ibyo biganiro bishobora gutanga umusaruro mu rwego rwo guteza imbere ubwiyunge hagati y’abanyapolitiki n’izindi nzego za sosiyete sivile. Icyakora, bagasanga ikibazo cy’intambara yo mu Burasirazuba bwa RDC gishobora gusaba indi nzira yihariye irimo impande zose zifite uruhare muri ayo makimbirane.
Mu gihe Guverinoma ikomeje imyiteguro y’iyi nama, abaturage n’imiryango mpuzamahanga bakomeje gukurikiranira hafi niba ibyo biganiro bizabasha kubaka ubwumvikane busesuye cyangwa niba kudahuza impande zose zifite uruhare mu bibazo bya RDC bizagira ingaruka ku ishyirwa mu bikorwa ry’imyanzuro izabifatirwamo.