Minembwe: Drone ya FARDC yasenye ibikorwa by’ubuvuzi byafashaga abaturage, bituma benshi bahunga
Mu gace ka Minembwe, mu Ntara ya Kivu y’Amajyepfo muri Repubulika Iharanira Demokarasi ya Congo, haravugwa igitero gikomeye cyagabwe hifashishijwe drone y’Ingabo za FARDC. Icyo gitero cyibasiye ibitaro bya Kalingi biherereye hafi ya Centre ya Minembwe, kikangiza bikomeye ibikorwa by’ubuvuzi ndetse n’ibikoresho by’ingenzi byari bihari.
Amakuru aturuka muri ako gace avuga ko icyo gitero cyabaye mu ijoro rishyira ku wa Mbere tariki ya 25/05/2026, aho iyo drone bivugwa ko yakoreshwaga mu bikorwa bya gisirikare ifatanyije n’imitwe ishyigikiye FARDC, irimo Wazalendo hamwe n’Ingabo z’u Burundi. Icyo gitero cyagabwe kuri ibyo bitaro biherereye mu gace ka Kalingi, kari mu ntera y’ibirometero bigera kuri bitatu uvuye mu mujyi muto wa Minembwe.
Nk’uko ayo makuru akomeza abivuga, ibyo bitaro byangiritse bikomeye, harimo gusenyuka kw’inyubako zimwe na zimwe ndetse n’isenyuka ry’ibikoresho by’ubuvuzi. Nubwo ibyangiritse bikomeye byagaragaye, ubuyobozi bw’ibi bitaro ntiburagira icyo butangaza ku mugaragaro.
Gusa kandi, amakuru avuga ko nta barwayi cyangwa abakozi b’ubuzima bahasize ubuzima muri icyo gitero, kuko mbere y’uko kibaho bari bamaze kwimurwa cyangwa guhungishwa mu rwego rwo kwirinda igihombo cy’abantu.
Iki gitero cyabaye mu gihe umutekano mu gace ka Minembwe wari umaze iminsi urushaho kuzamba, aho havugwa ibikorwa bya gisirikare by’imitwe itandukanye n’ihuriro rya FARDC n’abafatanyabikorwa bayo, bikomeje gukaza umurego mu duce dutuwe n’Abanyamulenge.
Mu minsi ibanziriza icyo gitero, ku wa Gatanu no ku wa Gatandatu, haravugwa ibindi bitero byagabwe mu gace ka Lundu, aho byakomerekeyemo abantu babiri barimo umugore witwa Nyanduhura Chantal. Nanone kandi, ibyo bikorwa by’intambara byasize amazu menshi y’abaturage yangiritse cyangwa asenyutse, bigatuma abaturage benshi bakomeza guhunga.
Kugeza ubu, ntiharamenyekana neza ingano nyayo y’ingaruka z’iki gitero ku rwego rwagutse, ariko amakuru akomeje kugaragaza ko ibikoresho by’ubuvuzi byangiritse bikomeye, bikaba bishobora kugira ingaruka ku mitangire ya serivisi z’ubuzima mu karere.
Uko ibintu bihagaze muri Minembwe, abaturage bakomeje kuba mu bwoba no mu rujijo, mu gihe ibikorwa bya gisirikare bikomeje kumvikana mu duce dutandukanye two muri Kivu y’Amajyepfo.
