Minembwe: Impungenge Zikomeje Kwiyongera Nyuma y’Indege za Gisirikare Zikomeje Kugaragara muri Ako Karere
Amakuru aturuka mu misozi ya Minembwe, mu Ntara ya Kivu y’Amajyepfo, aravuga ko ku Cyumweru, tariki ya 17/05/2026, indi ndege ya gisirikare yo mu bwoko bwa kajugujugu yaguye ahazwi nka Point Zéro, ahari ibirindiro by’ingabo za Repubulika Iharanira Demokarasi ya Congo (FARDC), zifatanyije n’ingabo z’u Burundi ndetse n’imitwe yitwaje intwaro irimo Wazalendo na FDLR.
Nk’uko amakuru yizewe abaturage bahaye Minembwe Capital News abivuga, iyo ndege yaturutse mu Mujyi wa Kalemie, mu Ntara ya Tanganyika, yitwaje ibikoresho byinshi bya gisirikare birimo amasasu, ibikoresho byifashishwa ku rugamba ndetse n’abasirikare bongerewe ku murongo w’imirwano.
Gukomeza kohereza indege za gisirikare muri ako gace bikomeje guteza impungenge abaturage bo mu misozi ya Minembwe, cyane cyane Abanyamulenge bavuga ko hari imyiteguro ikomeye iri gukorwa n’igisirikare cya FARDC hamwe n’abafatanyabikorwa bacyo, hagamijwe kugaba ibitero mu mihana ituwe n’abasivile.
Amakuru ava muri ako karere avuga ko ibitero bimaze iminsi byiyongera cyane mu bice bya Gakenke, Kalingi, Bidegu na Mikenke, aho abaturage bavuga ko hari ubwoba bw’intambara ishobora gufata intera nini kurushaho. Andi makuru avuga ko abatuye ibyo bice benshi bamaze guhunga ingo zabo kubera impungenge z’umutekano muke.
Abasesenguzi bakurikiranira hafi ikibazo cy’umutekano muri Kivu y’Amajyepfo bavuga ko kongera kohereza kajugujugu za gisirikare n’ibikoresho byinshi by’intambara bishobora gusobanura ko hari ibikorwa bya gisirikare bikomeye biri gutegurwa muri ako karere. Ibi kandi bibaye mu gihe imirwano hagati ya FARDC n’ihuriro rya Alliance Fleuve Congo (AFC/M23) ikomeje gukaza umurego mu bice byinshi byo mu Burasirazuba bwa Congo.
Ku wa Gatanu w’icyumweru gishize na bwo, amakuru yaturutse muri Minembwe yavugaga ko kuri Point Zéro hagejejwe izindi ndege nyinshi za kajugujugu za gisirikare. Aya makuru yanemejwe n’umuvugizi wa AFC/M23, wavuze ko hari ingufu za gisirikare zikomeje gukusanywa muri ako gace.
Mu ntangiriro z’icyumweru gishize kandi, imihana ituwe n’Abanyamulenge yo mu bice bya Gakenke, Kalingi, Bidegu na Mikenke yagabweho ibitero bikomeye. Amakuru ava muri ako gace avuga ko umutwe wa MRDP-Twirwaneho, uvuga ko urengera abaturage baho, wasubije inyuma ibyo bitero nyuma y’imirwano yamaze amasaha menshi.
Abaturage bo muri Minembwe bakomeje gusaba ko habaho guhagarika ibitero kugira ngo hirindwe ko ikibazo cy’umutekano gikomeza gufata indi ntera. Imiryango iharanira uburenganzira bwa muntu na yo ikomeje kugaragaza impungenge z’uko imirwano ikomeje muri ako karere ishobora guteza ubuhunzi, ubwicanyi ndetse n’ihungabana rikomeye ku baturage b’abasivile.
Nubwo impande zitandukanye zitanga amakuru anyuranye ku biri kubera muri Minembwe, ikigaragara ni uko umwuka mubi wa gisirikare ukomeje kwiyongera muri ako karere, mu gihe abaturage bavuga ko bakomeje kugabwaho ibitero n’ingabo za Leta zifatanyije n’ingabo z’u Burundi ndetse n’imitwe ya Wazalendo na FDLR.
