Minisitiri Nduhungirehe Yizeje Abaturage Amahoro n’Ubwirinzi Bukomeye mu Gihe Hari Impaka ku Mutekano w’Akarere
Mu gihe ibiganiro n’impaka ku mutekano w’Akarere k’Ibiyaga Bigari bikomeje gufata intera nshya, Minisitiri w’Ububanyi n’Amahanga n’Ubutwererane w’u Rwanda, Ambasaderi Olivier Nduhungirehe, yongeye gushimangira ko u Rwanda rufite umutekano usesuye, asaba Abanyarwanda kudahagarika imitima ahubwo bagakomera ku ituze n’icyizere cy’ejo hazaza.
Ibi yabigarutseho mu Nama y’Igihugu y’Umushyikirano yabereye muri Kigali Convention Centre, aho yagaragaje ishusho y’imiterere y’umutekano w’igihugu n’uruhare rw’u Rwanda mu bibazo bikomeje kugaragara mu burasirazuba bwa Repubulika Iharanira Demokarasi ya Congo (RDC).
Minisitiri Nduhungirehe yavuze ko u Rwanda rudafite uruhare mu ntambara ikomeje kubera muri RDC, ashimangira ko ari amakimbirane ashingiye imbere mu gihugu ubwacyo.
Yagize ati: “U Rwanda ntirwateje intambara muri RDC. Ibirego bivuga ko rushyigikiye ihuriro AFC/M23 ntibihura n’ukuri. Hari inzira z’ibiganiro Perezida Félix Tshisekedi ubwe yigeze gusaba ko zashyirwamo n’abandi bafatanyabikorwa, ariko u Rwanda ntirwigeze ruba muri ibyo biganiro.”
Yakomeje asaba ko hakwiye gushakwa ibisubizo by’amahoro binyuze mu biganiro by’Akarere, harimo no gushyira mu bikorwa amasezerano amaze gusinywa hagati y’impande zitandukanye.
Minisitiri Nduhungirehe yagaragaje ko nubwo hari amasezerano y’amahoro yasinyiwe i Washington, imirwano ikomeje mu burasirazuba bwa RDC itaracogora.
Yavuze ko ingabo za Leta ya RDC zikomeje kugaba ibitero ku baturage, cyane cyane mu bice by’Abanyamulenge, by’umwihariko mu Minembwe mu Karere ka Fizi.
Ibi, nk’uko yabivuze, bigaragaza ko hakiri icyuho mu ishyirwa mu bikorwa ry’amasezerano y’amahoro, bityo hakenewe kongerwa imbaraga mu biganiro no mu bufatanye bw’Akarere.
Minisitiri Nduhungirehe yashimangiye ko u Rwanda rukomeje gushyigikira inzira zose zigamije amahoro arambye mu karere, by’umwihariko ishyirwa mu bikorwa ry’amasezerano agamije guhashya umutwe wa FDLR no kugarura ituze ku mipaka ihuza ibihugu byombi.
Yavuze ko ingamba z’ubwirinzi u Rwanda rwashyizeho zitagamije kugaba igitero ku kindi gihugu, ahubwo zigamije kurinda ubusugire bw’igihugu n’umutekano w’abaturage bacyo.
Mu butumwa bwe, Minisitiri Nduhungirehe yasobanuye ko u Rwanda rwashyizeho uburyo bw’ubwirinzi bugezweho bugamije gukumira no gusubiza ibitero byashobora kugera ku butaka bw’igihugu.
Yagize ati: “U Rwanda rufite umutekano, u Rwanda rurarinzwe. Abanyarwanda baryame batekanye, basinzire neza. Hari ingamba z’ubwirinzi twashyizeho, harimo izo mwabonye zishobora gukumira ibisasu, ndetse n’izindi zitandukanye zigamije kurinda abaturage bacu.”
Yongeyeho ko izo ngamba zashyizweho nyuma y’ibitero byagiye bigabwa ku butaka bw’u Rwanda mu bihe byashize, harimo n’ibisasu byarashwe mu Karere ka Musanze mu 2022, bikaba byaratumye hashyirwaho uburyo bushya bwo kurinda abaturage.
Ubutumwa bwa Minisitiri Nduhungirehe buje mu gihe hakomeje impaka zikomeye ku mbuga nkoranyambaga no mu ruhando mpuzamahanga ku ruhare rw’u Rwanda mu ntambara yo mu burasirazuba bwa RDC.
Nubwo ibyo birego bikunze kuvugwa n’impande zimwe, ubuyobozi bw’u Rwanda burabihakana, bugashimangira ko igihugu cyibanda ku mutekano wacyo no ku bufatanye bw’Akarere mu gushaka ibisubizo birambye.
Ubutumwa bwa Minisitiri Olivier Nduhungirehe bugaragaza ishusho y’uko u Rwanda rwihagazeho mu bijyanye n’umutekano n’ubwirinzi mu gihe akarere kose gakomeje guhura n’ibibazo by’umutekano muke.
U Rwanda, nk’uko byagarutsweho, rukomeje gushimangira ko inzira y’amahoro ari yo yonyine ishobora gutanga umuti urambye ku bibazo by’umutekano mu karere k’Ibiyaga Bigari, mu gihe Abanyarwanda basabwa gukomeza kugira ituze n’icyizere cy’umutekano w’igihugu cyabo.
