Nangaa Yasubije ku Biganiro by’Abanyekongo bya Tshisekedi, Atangaza Icyo Abona Nk’Igisubizo ku Bibazo bya RDC
MINEMBWE CAPITAL NEWS (MCN)
Umuhuzabikorwa mukuru w’Ihuriro Alliance Fleuve Congo (AFC/M23), Corneille Nangaa, yagize icyo avuga ku biganiro by’Abanyekongo byatangajwe na Perezida wa Repubulika Iharanira Demokarasi ya Congo (RDC), Félix Tshisekedi, agaragaza ko atemera ko ibiganiro byonyine ari byo byakemura ibibazo byugarije igihugu.
Mu butumwa yashyize ahagaragara, Nangaa yavuze ko ibibazo bya RDC bidashobora gukemurwa gusa binyuze mu biganiro cyangwa mu masezerano avuga ko adafite ishingiro hagati ya Leta ya Kinshasa n’abatavuga rumwe na yo.
Yagize ati:
«“Igisubizo ku bibazo igihugu cyacu gihanganye na byo n’ubutegetsi bwa Kinshasa ntikiri mu biganiro cyangwa mu kumvikana kw’uburyarya n’umuntu uhora ahindura amagambo, utubahiriza ibyo yiyemeje.”»
Nangaa yakomeje avuga ko aho kubona ibiganiro nk’inzira nyamukuru yo gukemura ibibazo bya RDC, asanga hakenewe ibikorwa bigamije kuvugurura imikorere ya Leta n’inzego zayo.
Ati:
«“Igisubizo kiri mu bikorwa. Kiri mu kongera kubaka Leta nshya. Kiri mu gushyiraho ingabo zifite ubushobozi bwo gukumira ibitero, polisi irinda abaturage, ubutabera bugendera ku mategeko, ndetse n’ubuyobozi bushoboye kuyobora igihugu neza.”»
Aya magambo ya Corneille Nangaa aje nyuma y’uko Perezida Félix Tshisekedi atangaje ko hakenewe ibiganiro hagati y’Abanyekongo mu rwego rwo gushaka ibisubizo ku bibazo bya politiki n’umutekano bimaze igihe bihangayikishije igihugu, cyane cyane mu burasirazuba bwa RDC.
Gusa, umuyobozi wa AFC/M23 agaragaza ko ikibazo cya RDC kitari amakimbirane asanzwe yakemurwa n’ibiganiro gusa, ahubwo ko asanga gishingiye ku mikorere y’inzego za Leta, imiyoborere, umutekano ndetse n’ubutabera.
Ku ruhande rwa AFC/M23, ubuyobozi bw’iri huriro bumaze igihe bushinja ubutegetsi bwa Kinshasa kutubahiriza ibyo bwiyemeje mu masezerano no kunanirwa gukemura ikibazo cy’umutekano mu buryo burambye.
Leta ya RDC yo ikomeje gushinja AFC/M23 kuba umutwe witwaje intwaro uhungabanya ubusugire bw’igihugu, ndetse ikavuga ko ibiganiro bigomba kubaho hubahirijwe ubutegetsi bw’igihugu, Itegeko Nshinga n’amategeko ariho.
Impaka ku buryo ikibazo cya RDC cyakemuka zikomeje kwiyongera, aho bamwe mu banyapolitiki n’abasesenguzi bavuga ko ibiganiro bishobora kuba inzira yo kugabanya amakimbirane no gushaka ubwumvikane, mu gihe abandi bavuga ko hakenewe impinduka nini mu miyoborere no mu kubaka inzego za Leta zikomeye.
Kugeza ubu, ntiharamenyekana niba ibitekerezo bitandukanye hagati ya Leta ya Kinshasa n’abayirwanya bizashobora guhurizwa hamwe mu nzira imwe y’amahoro, mu gihe ikibazo cy’umutekano mu burasirazuba bwa RDC kigikomeje kuba kimwe mu bibazo bikomeye igihugu gihanganye na cyo.