Perezida Museveni na Tshisekedi Mu Nzira Yo Kurushaho Gukomeza Umubano
Perezida wa Repubulika Iharanira Demokarasi ya Congo, Félix Tshisekedi, yakiriye intumwa yihariye ya Perezida wa Uganda, Yoweri Museveni, yamushyiriye ubutumwa bwihariye bumutumira mu birori by’irahira rya Perezida Museveni biteganyijwe mu cyumweru gitaha i Kampala.
Aya makuru yatangajwe n’Ibiro bya Perezidansi ya RDC ku wa Gatatu tariki ya 06/05/2026, nyuma y’inama yabereye i Kinshasa hagati ya Perezida Tshisekedi na John Mulimba, Minisitiri wa Uganda ushinzwe ubutwererane bw’akarere akaba n’intumwa yihariye ya Perezida Museveni.
Mu itangazo ryashyizwe hanze na Perezidansi ya RDC, rivuga ko Perezida Tshisekedi yashyikirijwe ubutumwa bw’ubutumire bwo kuzitabira umuhango w’irahira rya Perezida Museveni uzaba ku wa Kabiri tariki ya 12/05/2026, nyuma y’uko yongeye gutorerwa kuyobora Uganda muri manda ya karindwi.
Perezida Museveni yongeye gutsinda amatora yabaye mu kwezi kwa mbere kwa 2026 ku majwi 71.65%, atsinda uwo bari bahanganye cyane, Bobi Wine, wagize amajwi 24.72%.
Ariko icy’ingenzi kiri inyuma y’ubu butumire si ukwitabira ibirori gusa. Hari ibimenyetso bikomeye byerekana ko Uganda na RDC bikomeje gushimangira umubano wa dipolomasi, ubufatanye mu by’umutekano ndetse n’ubukungu, mu gihe akarere k’Ibiyaga Bigari kagihanganye n’ibibazo bikomeye by’umutekano muke.
Perezidansi ya RDC yavuze ko uru ruzinduko rushobora gutanga amahirwe yo gusinya amasezerano mashya y’ubufatanye hagati y’ibihugu byombi, agamije guteza imbere ubuhahirane, ibikorwa remezo ndetse n’imikoranire ya gisirikare.
Mu myaka yashize, Uganda na RDC byakomeje kwegerana cyane cyane mu bikorwa byo kurwanya imitwe yitwaje intwaro ikorera mu burasirazuba bwa Congo, harimo umutwe wa ADF. Ingabo z’ibihugu byombi zakomeje ibikorwa bihuriweho byo guhiga uwo mutwe umaze igihe uhungabanya umutekano mu bice bya Kivu y’Amajyaruguru na Ituri.
Abasesenguzi ba politiki bavuga ko ubutumire bwa Museveni kuri Tshisekedi bufite uburemere bwa dipolomasi kurusha uko benshi babyibwira. Bugaragaza ko Kampala na Kinshasa bikomeje kubaka ubufatanye bushya bufite inyungu zikomeye ku mpande zombi, cyane cyane mu gihe RDC iri gushaka abafatanyabikorwa bakomeye bayifasha mu bibazo by’umutekano n’iterambere ry’ubukungu.
Ku ruhande rwa Uganda, gukomeza umubano mwiza na RDC bifite akamaro gakomeye mu rwego rw’ubucuruzi no kurinda inyungu zayo mu karere. RDC ni kimwe mu bihugu bifite isoko rinini ku bicuruzwa bya Uganda, kandi umutekano wo mu burasirazuba bwa Congo ugira ingaruka zikomeye ku bukungu n’umutekano bya Uganda.
Hari kandi ababona ko uku kwegerana gushobora kugira ingaruka kuri politiki y’akarere, cyane cyane mu mubano wa RDC n’ibindi bihugu byo mu Karere k’Ibiyaga Bigari. Mu gihe Kinshasa ikomeje gushaka uburyo bwo gukemura ikibazo cy’umutekano muke mu burasirazuba bw’igihugu, Uganda iri kwigaragaza nk’umwe mu bafatanyabikorwa Perezida Tshisekedi ashobora gukomeza kwishingikirizaho cyane.
Uru ruzinduko rwa Tshisekedi i Kampala, niruramuka rubaye, rushobora kuba ikimenyetso gikomeye cy’icyerekezo gishya cy’umubano hagati y’ibihugu byombi, ndetse rukaba intambwe nshya mu kurushaho gukomeza ubufatanye bwa politiki, ubukungu n’umutekano hagati ya Uganda na RDC.
