Niba Perezida Paul Kagame ari umunyagitugu, nakwifuza ko Afrika igira benshi nka we, byavuzwe n’umuyobozi ukomeye muri Afrika.
Yanditswe na Bruce Bahanda, kw’itariki 05/07/2023, saa 4:00pm, kumasaha ya Bukavu na Minembwe.
Umuyobozi w’ishuri rikuru rya gisirikare mugihugu ca Ghana, Dr Vladimir Antwi-Danso, yatangaje ko avuga ati: “Niba Perezida Paul Kagame ari umunyagitugu nk’uko bamwe babivuga, nakwifuza ko umugabane wa Afrika wose ugira abantu benshi bameze nka we.”
Dr Danso, ibi yabivuze ubwo yari mu kiganiro yagiranye n’umunyamakuru Korku Lumor wa TV Africa mu gitondo cyo kw’itariki 04/07/2023, nk’uko Ghana Web yabitangaje, yavuze ko ijambo ‘Demokarasi’ rigira ibisobanuro bitandukanye bitewe n’aho rikoreshwa.
Iyi mpuguke muri politiki n’umutekano yasobanuye ko hari abitwa “abubahiriza Demokarasi” ariko ibikorwa byabo bikaba bihabanye na yo, abandi bakitwa “abanyagitugu”, ariko baravanye ibihugu byabo kure, babigeza ku iterambere rigaragarira benshi.
Ati: “Mpora mvuga ko nahitamo umunyagitugu uzi aho ari kwerekeza igihugu cye, akacyubaka abinyujije mu nzego za Leta kugira ngo gitere imbere, aho guhitamo uwitwa umudemokarate umbeshya, ansha mu rihumye, akanyiba, n’Isi yose ikamusingiza nk’umudemokarate.”
Dr Danso yatanze urugero, avuga ko u Rwanda ruri mu bihugu byitwa ko biyobojwe igitugu, kandi atari ko biri.
Ati: “Urebye igihugu nk’u Rwanda, watekereza ko nta demokarasi ibayo ariko ndasaba ko mubitandukanya. Reba, kuva mu 1994 iterambere kiriya gihugu cyagezeho ku buyobozi bw’uwitwa umunyagitugu. Kandi niba iki ari igitugu, turagishaka cyinshi muri Afrika.”
Perezida Kagame mu kiganiro yagiranye na François Soudan na Romain Gras ba Jeune Afrique mukwezi kwa mbere, umwaka wa 2022, yavuze ko bishoboka ko imiterere ye ari yo ituma abantu bamwita umunyagitugu, kandi ngo ntacyo yabihinduraho.
Umukuru w’Igihugu yagize ati: “Nk’abandi bose, hari igice cyanjye ntashobora guhindura. Hari ikindi gice gukorana bishoboka. Ntabwo byashoboka ko mpindura uturemangingo twanjye. Wasanga ari byo bituma hari abambona nk’umunyagitugu, simbizi. Icyakora, ndi umuntu uhora witeguye gukorana n’abandi.”
Perezida Kagame yayoboye u Rwanda kuva mu mwaka w’2000. Ni umwanya yagiyeho nyuma y’imyaka 6 abohoye icyo gihugu hamwe n’ingabo za RPF Inkotanyi. Wavel Ramkalawan uyobora Madagascar we amubona nk’umwe mu bihangange by’Abanyafrika.
