Haravugwa imirwano ikaze hagati y’Ababembe n’Ababuyu.
Isubiranamo ry’Ababembe n’Ababuyu rishingiye ku butaka, rya bereye muri teritware ya Kabambari mu Ntara ya Maniema mu Burasirazuba bwa Repubulika ya demokarasi ya Congo.
Ni imirwano imaze igihe, ariko ikaba yarongeye gufata indi ntera ku buryo budasanzwe kuva tariki ya 11/12/2024.
Amakuru ava muri ibyo bice bikomeje kuberamo imirwano byo muri teritware ya Kabambari avuga ko mu Cyumweru cyo hirya kugeza ku wa gatanu w’iki Cyumweru dusoje byabayemo ihangana rikomeye hagati y’aya moko yombi.
Iri hangana rikaba ryarasize abantu bagera ku 7.200 bavanywe mu byabo nyuma y’imirwano.
Ni amakuru kandi avuga ko abarwana ku ruhande rw’Ababembe baturutse mu duce two muri Secteur ya Ngandji muri teritware ya Fizi mu Ntara ya Kivu y’Amajy’epfo, nk’uko byemezwa na perezida wa sosiyete sivile wo muri Fizi, Samy Kalonji Badibanga.
Uyu Samy Kalonji Badibanga yanavuze ko yageze ahitwa i Lwiko ho muri Kabambari mu rwego rwo guhuza impande zihanganye ariko biba ibyubusa.
Ikindi yavuze nuko aha i Lwiko yageze ni ko gace katangiriyemo imirwano yo gusubiranamo hagati y’Ababembe n’Ababuyu.
Avuga kandi ko abahunze benshi kuri ubu barara mu mashyamba, abandi bafite abana bagiye bahungira mu mashuri no mu nsengero, ziri ahitwa Penemembe no mu tundi duce turi munkengero yayo.
Kugeza ubu abakuwe mu byabo nta mfashanyo barahabwa, nk’uko sosiyete sivile yakomeje ibivuga.
