Kateku: Umuyobozi mushya washyizweho na AFC/M23 yishwe nyuma y’amasaha make, ibintu byateje impagarara zikomeye
Mu gace ka Kateku gaherereye mu muhana wa Iremya, muri grupema ya Ikobo, teritwari ya Walikale mu ntara ya Kivu y’Amajyaruguru, haravugwa inkuru y’iyicwa ry’umuyobozi mushya w’uwo muhana, wishwe mu buryo bwateye ubwoba nyuma y’amasaha atarenze 48 gusa ahawe inshingano n’ihuriro Alliance Fleuve Congo (AFC/M23). Bikekwa ko yishwe n’abarwanyi ba Wazalendo bafatanyije n’ingabo za Repubulika Iharanira Demokarasi ya Congo (FARDC).
Amakuru aturuka muri ako karere avuga ko uyu muyobozi yishwe ku wa Gatatu tariki ya 13/05/2026, aho abarwanyi ba Wazalendo bamusanze iwe mu rugo nijoro bakamurasa amasasu menshi imbere y’abagize umuryango we mbere yo guhita bacika.
Abaturage bo muri Kateku bavuga ko urwo rupfu rwateje ubwoba n’agahinda gakomeye muri ako gace, cyane cyane ko uyu mugabo yari amaze iminsi ibiri gusa ashyizwe ku buyobozi bw’uwo muhana nyuma y’uko AFC/M23 ifashe grupema ya Ikobo.
Nk’uko amakuru ava muri ako gace abivuga, abagabye icyo gitero bageze iwe nijoro bamusanze mu rugo rwe, bamurasa amasasu menshi imbere y’umugore n’abana be. Nyuma yo kumwica, abo barwanyi bahise bahungira mu mashyamba.
Ababonye ibyabaye bavuga ko uwo mugabo yishwe mu buryo bwihuse kandi bugaragaza ko yari yagabweho igitero cyateguwe. Hari amakuru avuga ko uburyo yarashwemo bwagaragazaga ko abagabye igitero bari bafite intego yo kumwivugana nta mahirwe yo kurokoka bamusigiye.
Abaturage bo muri Ikobo bavuga ko bishobora kuba bifitanye isano n’amakimbirane y’ubutegetsi ndetse no guhatanira kugenzura uturere turi mu maboko y’impande zihanganye muri Kivu y’Amajyaruguru, cyane cyane mu gihe Wazalendo bashakaga guha ubutumwa AFC/M23 yari imaze kumushyiraho nk’umuyobozi.
Uyu muyobozi ni umwe mu bashyizweho n’ihuriro Alliance Fleuve Congo (AFC/M23) nyuma yo gufata ibice bya grupema ya Ikobo. Mu minsi ishize, iri huriro ryari ryatangiye gushyiraho abayobozi bashya mu duce dutandukanye two muri ako karere mu rwego rwo gushyiraho ubuyobozi bushya.
Iyicwa rye rikaba ribaye ubwa mbere kuva AFC/M23 yafata icyo gice ikanashyiraho abayobozi b’inzego z’ibanze, ibintu bikomeje kongera impungenge z’umutekano muke ndetse n’ubushyamirane bushobora gukomeza kwiyongera hagati y’impande zihanganye muri Walikale.
Umubiri wa nyakwigendera washyinguwe ku wa Kane tariki ya 14/05/2026 mu muhango waranzwe n’agahinda n’icuraburindi mu muhana wa Kateku. Abaturage benshi bitabiriye umuhango wo kumusezeraho bavuga ko batewe impungenge n’ukuntu umutekano ukomeje kuzamba muri ako gace.
Mu gihe ibikorwa by’intambara bikomeje hagati ya AFC/M23, FARDC n’imitwe ya Wazalendo mu bice byinshi bya Kivu y’Amajyaruguru, abaturage bakomeje kuba ab’imbere mu guhura n’ingaruka zirimo ubwicanyi, guhunga ndetse n’umutekano muke ukabije.
