Kwinjira kw’Ingabo z’u Burundi mu Bibogobogo Kwongeye Impungenge z’Umutekano mu misozi y’i Mulenge
Amakuru aturuka mu gace ka Bibogobogo gaherereye muri teritwari ya Fizi, mu ntara ya Kivu y’Amajyepfo, aravuga ko mu gitondo cyo kuri uyu wa Kane tariki ya 16 Mata 2026, hagaragaye ingabo nyinshi z’u Burundi zinjiye muri ako gace, mu gihe umutekano ukomeje kuba muke mu misozi ya Minembwe no mu nkengero zayo.
Nk’uko abatangabuhamya babivuga, izo ngabo zahageze mu masaha ya kare y’igitondo, bivugwa ko zanyuze mu nzira y’amazi zambuka ikiyaga cya Tanganyika, ziturutse mu mujyi wa Bujumbura, zibanza kugera i Baraka mbere yo kwerekeza i Bibogobogo.
Umwe mu baturage utuye muri ako gace yagize ati: “Mu gitondo cya kare, twabonye abasirikare benshi baje mu Bibogobogo. Hari impungenge zikomeye ku mutekano w’abaturage, cyane cyane abatuye mu misozi ya Minembwe.”
Aya makuru akomeza avuga ko abo basirikare bashobora guhita berekeza mu bice bya Minembwe, Mikenke n’i Ndondo, aho bivugwa ko hashobora kubera ibikorwa bya gisirikare mu minsi iri imbere. Ibi bikaba bibaye mu gihe aka karere kamaze igihe karangwa n’intambara zishingiye ku moko n’imitwe yitwaje intwaro itandukanye.
Ibivugwa n’abaturage bamwe byerekana ko hari impungenge z’uko ibi bikorwa bya gisirikare bishobora kugira ingaruka ku baturage b’Abanyamulenge batuye muri ibyo bice. Gusa, nta rwego rwa Leta cyangwa urw’igisirikare ruratangaza ku mugaragaro intego y’izo ngabo cyangwa ibikorwa zigiye gukora.
Ni kenshi mu bihe byashize havuzwe ibirego bishinja ingabo zitandukanye, zirimo iz’u Burundi n’iza FARDC (Ingabo za Repubulika Iharanira Demokarasi ya Congo), kugira uruhare mu ihohoterwa rikorerwa abasivili. Icyakora, ibyo birego byagiye bihakanwa kenshi n’impande zishinjwa.
Amakuru kandi agaragaza ko muri aka gace ka Bibogobogo hategerejwe ibiganiro bishobora guhuza bamwe mu bayobozi b’imitwe yitwaje intwaro, barimo Yakutumba wo mu mutwe wa Wazalendo na Nyamusaraba uyobora umutwe wa Gumino, ufatanya n’ihuriro rya P5 hamwe na FARDC.
Ibi biganiro bivugwa ko bishobora kuba bigamije gusobanura no guhakana ibirego byagejejwe ku rwego mpuzamahanga bishinja ingabo z’u Burundi n’iza Congo kugira uruhare mu bwicanyi bukorerwa abaturage, cyane cyane Abanyamulenge.
Umwe mu baduhaye aya makuru yagize ati: “Hari gutegurwa ibiganiro bizitabirwa n’abayobozi batandukanye n’abanyamakuru, hagamijwe gusobanura uko ibintu bihagaze no guhakana ibyo u Burundi na Leta y’i Kinshasa bashinjwa byo kwica Abanyamulenge mu misozi miremire y’i Mulenge.”
Icyakora, abasesenguzi b’umutekano bavuga ko kwiyongera kw’ingabo z’amahanga mu burasirazuba bwa Repubulika Iharanira Demokarasi ya Congo bishobora kurushaho gukaza umwuka mubi, mu gihe aka karere kamaze igihe kirekire karimo imitwe myinshi yitwaje intwaro, imikoranire yayo n’ingabo za FARDC n’iz’u Burundi, amakimbirane ashingiye ku moko, ndetse n’inyungu z’ibihugu bitandukanye.
Mu gihe amahanga akomeje gukurikirana iby’iyi dosiye, haracyakenewe amakuru arambuye kandi yizewe kugira ngo hamenyekane neza ukuri ku biri kubera muri utu duce no ku ngaruka bishobora kugira ku baturage bahatuye.
