Minembwe: Imirwano Ikomeje Gukaza Umurego, Mu Gihe Hakomeje Impaka ku Mugenzo w’Urugamba
Mu gihe umutekano ukomeje kuba mubi mu misozi ya Minembwe no mu bice bitandukanye byo mu Ntara ya Kivu y’Amajyepfo, imirwano ikomeye irakomeje hagati ya MRDP-Twirwaneho n’ihuriro ry’ingabo za Leta ya Repubulika Iharanira Demokarasi ya Congo (FARDC), rigizwe n’ingabo za FARDC, iz’u Burundi, umutwe wa FDLR ndetse n’imitwe ya Wazalendo.
Amakuru aturuka ahabera imirwano avuga ko kugeza ubu imirwano ikomeye iri kubera mu gace ka Lundu, cyane cyane ku musozi wa Ruhinamavi no muri Gakenke, aho ihuriro ry’ingabo za Leta rikomeje guhangana bikomeye na MRDP-Twirwaneho. Ahandi havugwa ibikorwa bya gisirikare harimo Kalingi, Bidegu n’utundi duce twegereye Minembwe.
Nk’uko amakuru atangwa n’abaturage ndetse n’andi masoko yo mu karere abivuga, umutwe wa MRDP-Twirwaneho ukomeje guhangana n’ibi bitero, ugamije kurinda abaturage no gusubiza inyuma ibitero by’imitwe iwurwanya. Iyi mirwano ikomeje guteza impungenge abaturage benshi bamaze imyaka bahanganye n’ibibazo by’umutekano muke, kwimurwa mu byabo ndetse n’ibibazo by’ubutabazi.
Mu masaha make ashize, ubuyobozi bwa FARDC bwatangaje ko bwafashe agace ka Minembwe Centre. Ariko aya makuru, nk’uko amakuru atangwa n’andi masoko abivuga, ntabwo ahuye n’ibiri kugaragara ku butaka, kuko kugeza ubu Minembwe Centre igikomeje kugenzurwa na MRDP-Twirwaneho.
Amakuru Minembwe Capital News yakomeje gukurikirana avuga ko kugeza ubu Minembwe Centre igikomeje kugenzurwa na MRDP-Twirwaneho, kandi ko ibikorwa by’ubuyobozi n’umutekano bikigaragara muri uwo mujyi. Ibi bituma hakomeza kubaho impaka ku makuru atangwa n’impande ziri mu mirwano, buri ruhande rugaragaza ko rufite intsinzi ku rugamba.
Abasesenguzi bamwe bavuga ko amakuru aturuka ku rugamba akwiye gukomeza kugenzurwa no kwemezwa n’inzego zigenga, kuko mu bihe by’intambara impande zihanganye zikunze gutangaza amakuru agamije kuzamura morale y’abazishyigikiye.
Hagati aho, Umuvugizi wa Alliance Fleuve Congo (AFC/M23), Lawrence Kanyuka, yasohoye itangazo rikomeye anenga amagambo Perezida Félix Tshisekedi aherutse gutangariza i Houston muri Leta Zunze Ubumwe za Amerika.
Muri iryo tangazo, AFC/M23 yavuze ko abaturage ba Congo, abahuza mu biganiro by’amahoro ndetse n’abafatanyabikorwa mpuzamahanga babonye amagambo ya Perezida Tshisekedi nk’atesha agaciro umwuka w’agahenge waturutse mu biganiro bya Doha.
AFC/M23 ivuga ko ayo magambo ashobora guteza imbere imvugo z’urwango, gukaza ivangura rikorerwa amwe mu moko n’imiryango bigize Repubulika Iharanira Demokarasi ya Congo, ndetse no kongera amacakubiri hagati y’Abanyekongo.
Nk’uko iri huriro ribivuga, igihugu kiri mu bibazo bikomeye bya politiki, umutekano n’ubutabazi; bityo hakenewe uburyo bushya bw’imiyoborere bushingiye ku butabera, uburinganire bw’abaturage bose imbere y’amategeko, kubaka inzego zikora neza no kwimakaza ubumwe bw’Abanyekongo.
AFC/M23 kandi yongeye gushimangira ko izakomeza ibikorwa byo kurinda abaturage, ubuzima bwabo, imitungo yabo n’icyubahiro cyabo, kandi ko izakomeza guharanira ishyirwaho ry’ubutegetsi bushingiye ku mategeko, inshingano ndetse n’inyungu rusange z’abaturage.
Mu gihe impande zitandukanye zikomeje gutangaza imyanya zafashe n’intsinzi zivuga ko zagezeho, abaturage bo mu misozi ya Minembwe bakomeje kuba ari bo bahura n’ingaruka zikomeye z’iyi mirwano. Raporo zitandukanye zigaragaza ko abaturage benshi bakomeje guhunga ingo zabo, mu gihe abandi bahanganye n’ibibazo byo kubona ibiribwa, ubuvuzi n’ubundi bufasha bw’ibanze.
Abakurikirana ikibazo cy’umutekano muri Minembwe bavuga ko amahoro arambye azagerwaho binyuze mu nzira za politiki n’ibiganiro bihuza impande zose zifitanye amakimbirane, aho gukomeza gukoresha ingufu za gisirikare zonyine.
Kugeza igihe iyi nkuru yandikirwaga, imirwano yari igikomeje mu duce twa Lundu, Ruhinamavi na Gakenke, mu gihe abaturage bakomeje gukurikiranira hafi uko ibintu byifashe ku rugamba no mu biganiro bya politiki biri kubera ku rwego rw’akarere n’amahanga.
Minembwe Capital News
