MINEMBWE YONGEYE KWISANGA MU BIHE BIKOMEYE: Sosiyete Sivili Yagaragaje Impungenge ku Miterere Mibi y’Umutekano Ikomeje Guhungabanya Abaturage
Sosiyete Sivili ya Minembwe yasohoye itangazo rikubiyemo impungenge zikomeye ku miterere y’umutekano ikomeje kuzamba muri aka karere ko mu Ntara ya Kivu y’Amajyepfo. Iri tangazo rivuga ko hagati y’itariki ya 07 na 12/06/2026, ibikorwa by’urugomo n’imirwano byafashe indi ntera, bikarushaho gushyira abaturage mu kaga gakomeye.
Nk’uko iri tangazo ryashyizweho umukono na Perezida wa Sosiyete Sivili ya Minembwe, Mufashi Santos, ribigaragaza, ibice bitandukanye birimo Minembwe Centre, Kalingi, Bidegu, Kalongi, Gakenke, Rubemba na Ilundu byibasiwe n’ibikorwa by’intambara byatumye ubuzima bw’abaturage burushaho guhungabana.
Sosiyete Sivili ivuga ko ku itariki ya 12/06/2026 habaye ibitero bibiri by’indege byagabwe mu gace ka Minembwe Centre. Aya makuru agaragaza ko ibyo bitero byateje iyangirika rikomeye ku mitungo y’abaturage, harimo amazu n’ibindi bikorwa remezo by’abasivili.
Nubwo amakuru arambuye ku mubare nyawo w’abahitanywe n’ibi bitero ataratangazwa ku mugaragaro, abaturage bavuga ko byateje ubwoba bukomeye, bikaba byarushijeho gutuma benshi bahunga ingo zabo bashaka aho bikinga umusaya.
Mbere y’ibi bitero, imirwano ikomeye yari imaze iminsi ibera mu duce twa Kalingi, Bidegu, Kalongi, Gakenke na Ilundu, aho amakuru aturuka muri ako karere avuga ko impande zihanganye zakomeje kurwanira kugenzura ibice bitandukanye.
Iyi mirwano yakurikiwe n’ingaruka zikomeye zirimo gutakaza ubuzima bw’abantu, gukomereka kwa benshi, gusenyuka kw’amazu y’abaturage ndetse no kwangirika kw’amatungo, yari isoko y’imibereho ku miryango myinshi.
Amashusho yakwirakwijwe ku mbuga nkoranyambaga agaragaza bamwe mu bakomerekeye muri iyo mirwano, barimo abagore n’abana, ibintu byakomeje gutera impungenge abaturage n’abakurikiranira hafi ikibazo cy’umutekano muri Minembwe.
Sosiyete Sivili ya Minembwe ivuga ko ibikorwa byinshi by’ubukungu n’imibereho byahagaze kubera umutekano muke. Amaduka, amasoko, ibikorwa by’ubuhinzi n’ubworozi ndetse n’ingendo hagati y’uduce dutandukanye byagize ingaruka zikomeye.
Imiryango myinshi iri mu buzima bugoye, aho abaturage benshi bavuga ko babayeho mu bwoba buhoraho bwo kugabwaho ibitero cyangwa kwisanga hagati y’imirwano.
Abaturage bakomeza gushimangira ko ikibazo cy’umutekano gikomeje kuba ingorabahizi ku buzima bwabo bwa buri munsi, cyane cyane ku bana, abagore n’abageze mu zabukuru bakomeje guhura n’ingaruka z’intambara.
Mu itangazo ryayo, Sosiyete Sivili ya Minembwe yibukije ko amategeko mpuzamahanga agenga intambara arengera abasivili n’ibyabo igihe cyose, kandi ko kugaba ibitero bibibasira mu buryo butaziguye bibujijwe n’amategeko mpuzamahanga arengera ikiremwamuntu.
Yasabye ko:
Imirwano n’ibikorwa byose by’urugomo bihita bihagarara, cyane cyane mu bice bituwemo n’abaturage;
Hakorwa iperereza ryigenga kandi ribogamye ku byabaye kugira ngo ukuri kumenyekane;
Imiryango itanga ubutabazi ihabwa uburyo bwo kugera ku baturage bakeneye ubufasha nta nkomyi.
Sosiyete Sivili ya Minembwe yatangaje ko izakomeza gukusanya amakuru no gukurikirana ibibera muri aka karere, kugira ngo ijwi ry’abaturage rikomeze kumvikana, ndetse no gukomeza gusaba ko abasivili bose barindwa nta vangura iryo ari ryo ryose.
Mu gihe umutekano ukomeje kuba ikibazo gikomeye muri Minembwe no mu bindi bice byo mu misozi miremire ya Fizi, abaturage bakomeje gusaba ibisubizo birambye byagarura amahoro n’umutekano, kugira ngo bongere kubaho mu buzima busanzwe.
Minembwe ikomeje kuba imwe mu ngingo zikomeye z’umutekano mu Burasirazuba bwa Repubulika Iharanira Demokarasi ya Congo, aho abaturage bavuga ko icyifuzo cyabo cya mbere ari ukubona amahoro arambye no kurindwa mu buryo busesuye.
