Perezida Tshisekedi yongeye kwivumbura ntiyitabira inama y’umuryango wa EAC.
Perezida wa Repubulika ya demokarasi ya Congo, Félix Tshisekedi yanze kwitabira inama y’umuryango w’ibihugu bya Afrika y’iburasirazuba (EAC) igira iya 24, akaba ariwe wagomba guhabwa kuyobora uyu muryango.
Iyi nama y’abakuru b’ibihugu bya EAC yateranye ku wa 30/11/2024, aho yanasize perezida wa Kenya, William Ruto, atorewe kuyobora uyu muryango mu gihe Tshisekedi ariwe wari guhabwa iyo nkoni.
Tshisekedi wari gutorerwa kuyobora EAC asimbuye perezida wa Sudan y’Epfo, Salva Kiir Mayard; igitangaje uyu Tshisekedi ntiyohereje n’intumwa yo kumuhagararira muri iyo nama.
Abakuru b’ibihugu bayitabiriye, ni Salva Kiir Mayard wa Sudan y’Epfo, Kaguta Museveni wa Uganda, Paul Kagame w’u Rwanda, Samia Suluhu Hassan wa Tanzania na William Ruto wa Kenya.
Undi utaritabiriye iyi nama ni perezida Evariste Ndayishimiye w’u Burundi, ariko we yohereje visi perezida umuhagarari, Prosper Bazombanza.
Tshisekedi kutitaba inama ya EAC bibaye ku nshuro ya kabiri kuko no mu kwezi kwa gatandatu uyu mwaka yanze kuyitabira.
Icyo gihe, Tshisekedi yivumbuye ku mpamvu z’uko perezida Ruto wa Kenya yavuze ko abarwanyi bu mutwe wa M23 atari Abanyarwanda.
Gusa, ibyo bibaye mu gihe Abanyekongo benshi bamusaba kwikura mu muryango wa EAC.
Ahanini ubu busabe bwatewe n’intambara ingabo z’iki gihugu zimaze iminsi zikubitirwamo n’umutwe wa M23.
Bijanye kandi no kuba ingabo za EAC zoherejwe muri icyo gihugu umwaka ushize, zaranze kurwanya umutwe wa M23, byatumye uyu muryango Abanyakongo bawushinja gushyigikira uyu mutwe.
Ikindi n’uko iki gihugu cya RDC kuva cyinjira muri uyu muryango mu mwaka w’ 2022, ntikirigera gitanga umusanzu ibihugu binyamuryango bigenewe gutanga.
