Umwuka w’intambara hagati ya Iran na Amerika ukomeje gukara, mu gihe ikibazo cya Hormuz gikomeje guteza impungenge

Umwuka w’intambara hagati ya Iran na Leta Zunze Ubumwe za Amerika ukomeje gukara, mu gihe ibiganiro bigamije gushaka umuti wa dipolomasi bikomeje kugorana, ndetse n’urujya n’uruza rw’amato atwara peteroli mu Nyanja ya Hormuz rukaba rugihungabanye.

Mu kimenyetso gikomeye cy’uko impande zombi zikomeje gufata imyanzuro ikakaye, Umugaba Mukuru w’Ingabo za Iran, Major General Amir Hatami, yatangaje ko umuntu uzafata cyangwa akica umusirikare w’Umunyamerika azahabwa igihembo cya miliyoni 30 z’amadolari y’Amerika.

Hatami yatangaje kandi ko igihembo gishobora kuba amadolari 60,000 mu gihe icyo gikorwa cyaba cyakozwe n’umugore w’Umunya-Iran. Ibi yabitangaje abinyujije ku gitangazamakuru cya Leta ya Iran, IRNA, mu gihe amakimbirane hagati ya Tehran na Washington akomeje gufata indi ntera.

Ikibazo cya Hormuz ni kimwe mu bikomeje kongera ubukana bw’aya makimbirane. Umuhanda wa Hormuz ufite akamaro gakomeye ku isoko ry’ingufu ku isi, kuko ari inzira y’ingenzi ikoreshwa n’amato atwara peteroli n’ibindi bicuruzwa by’ingufu.

Mu gihe impande zombi zitarumvikana ku buryo bwo guhagarika burundu imirwano, urujya n’uruza rw’amato muri uyu muhanda w’amazi rwakomeje guhungabana. Ibi byongera impungenge ku masoko ya peteroli ndetse no ku mutekano w’ubwikorezi bwo mu nyanja.

Nubwo hakomeje kuvugwa imbaraga za dipolomasi zigamije gutuma Washington na Tehran basubira ku meza y’ibiganiro, kugeza ubu nta kimenyetso gikomeye cyerekana ko impande zombi zageze ku mwanzuro ushobora guhagarika burundu imirwano.

Iran ikomeje gusaba ko ingabo z’Amerika ziva mu karere, mu gihe Washington na yo ikomeje gushyira igitutu kuri Tehran. Ibi bituma ikibazo cya Hormuz, ingabo z’Amerika ziri mu Burasirazuba bwo Hagati ndetse n’imikorere y’ubucuruzi bwo mu nyanja bikomeza kuba intandaro y’impungenge mpuzamahanga.

Iri tangazo rya Hatami ryafashwe nk’ikindi kimenyetso cy’uko imvugo ya gisirikare hagati ya Iran na Amerika ikomeje gukara. Nubwo nta ngabo z’Amerika zizwiho kuba ziri ku butaka bwa Iran muri iki gihe, usibye ibikorwa byihariye byabaye mbere, Amerika ifite ingabo nyinshi mu Burasirazuba bwo Hagati.

Ku ruhande rwa Iran, ubuyobozi bukomeje kugaragaza ko butifuza ko ingabo z’Amerika zigera mu bice birimo Persian Gulf, Gulf of Oman na Strait of Hormuz, mu gihe Washington na yo ikomeje kurengera inyungu zayo n’ubwikorezi bwo mu nyanja.

Ibi byose bituma ikibazo cya Iran na Amerika kirenga imipaka y’ibihugu byombi, kuko Hormuz ari inzira y’ingenzi ku bukungu bw’isi. Bityo, intambara iramutse ikomeje kwiyongera, ishobora kugira ingaruka ku itwarwa rya peteroli, ibiciro by’ingufu ndetse n’ubucuruzi mpuzamahanga.

Kugeza ubu, icyizere cy’ibiganiro kiracyariho, ariko amagambo akakaye n’ibikorwa bya gisirikare bikomeje gutuma inzira igana ku mahoro iba ndende kandi itoroshye.