Impinduka Zikomeye muri Kaminuza ya Goma: AFC/M23 Yatangaje Ubuyobozi Bushya bwa UNIGOM
Ihuriro Alliance Fleuve Congo (AFC/M23) ryatangaje ko ryashyizeho Prof. Jean Baptiste Kakoma Sakatolo Zambeze ku mwanya w’Umuyobozi Mukuru wa Kamginuza ya Goma (UNIGOM), asimbuye Prof. Mughanda Muhindo Célestin wari umaze iminsi mike akuwe kuri uwo mwanya.
Ibi bikubiye mu Cyemezo No 032/COORDA-PAJD/BB/AFC-M23 cyo ku wa 29/05/2026, cyashyizweho umukono na Bertrand Bisimwa, Umuhuzabikorwa Wungirije wa AFC/M23 ushinzwe ibibazo bya politiki, ubutegetsi, ubutabera na dipolomasi, mbere yo kwemezwa na Corneille Nangaa Yobeluo, Umuhuzabikorwa Mukuru w’iri huriro.
Iri shyirwaho rije rikurikira impinduka zimaze iminsi zikorwa na AFC/M23 mu nzego zitandukanye z’ubuyobozi mu bice igenzura, cyane cyane mu Ntara ya Kivu y’Amajyaruguru. Mu rwego rwo gukomeza kunoza imikorere y’inzego za leta n’ibigo bya leta biri muri ibyo bice, AFC/M23 yakomeje gushyiraho abayobozi bashya mu nzego z’uburezi, ubuzima n’izindi serivisi zifitiye abaturage akamaro.
Uretse Prof. Jean Baptiste Kakoma Sakatolo Zambeze wagizwe Umuyobozi Mukuru wa Kaminuza ya Goma, AFC/M23 yanatangaje abagize komite nshya y’ubuyobozi bwa UNIGOM.
Muri bo harimo:
Prof. Richard Kabuyanga Kabuseba, wagizwe Umunyamabanga Mukuru ushinzwe amasomo (Secrétaire Général Académique);
Prof. Nzabandora Ndimubanzi, wagizwe Umunyamabanga Mukuru ushinzwe ubushakashatsi;
Butotima Safari, wagizwe Umunyamabanga Mukuru ushinzwe ubutegetsi;
Paluku Malisawa, wagizwe Umuyobozi ushinzwe ingengo y’imari n’imicungire y’umutungo.
Nk’uko bikubiye mu ngingo ya gatatu y’icyo cyemezo, AFC/M23 yatangaje ko amategeko yose cyangwa ibyemezo byose byari byarafashwe mbere kandi binyuranyije n’iki cyemezo bisheshwe, bityo ntibikomeze kubahirizwa.
Ishyirwa mu bikorwa ry’iki cyemezo ryahawe Umunyamabanga Uhoraho wa AFC/M23, ushinzwe gukurikirana ko impinduka zatangajwe zubahirizwa kandi zigatangira gushyirwa mu bikorwa nta nkomyi.
Izi mpinduka zibaye nyuma y’uko tariki ya 28/05/2026 AFC/M23 yatangaje ko ikuye ku mirimo Prof. Mughanda Muhindo Célestin wari usanzwe ayobora Kaminuza ya Goma.
Nk’uko byatangajwe n’ubuyobozi bw’iri huriro, Prof. Mughanda yari amaze igihe kinini atagaragara ku kazi kandi atuzuza inshingano yari yarahawe zo kuyobora iki kigo cy’amashuri makuru. Icyo cyemezo cyakurikiwe no gushaka umusimbura kugira ngo ibikorwa bya kaminuza bikomeze nta nkomyi.
Nubwo AFC/M23 yatanze impamvu zijyanye no kutagaragara ku kazi, kugeza ubu nta makuru arambuye aratangazwa ku mpamvu nyakuri zatumye uwo muyobozi ava ku mirimo ye cyangwa niba hari ibisobanuro yigeze gutanga ku birego byamushinjwaga.
Kaminuza ya Goma (UNIGOM) iri mu bigo bikomeye by’amashuri makuru n’ubushakashatsi byo mu Burasirazuba bwa Repubulika Iharanira Demokarasi ya Congo. Yashinzwe hagamijwe gutanga ubumenyi buhanitse no guteza imbere ubushakashatsi mu nzego zitandukanye zirimo ubuvuzi, amategeko, ubukungu, ikoranabuhanga n’uburezi.
Mu myaka ishize, iyi kaminuza yakomeje kugira uruhare mu gutanga impuguke n’abakozi bafite ubumenyi mu Ntara ya Kivu y’Amajyaruguru no mu gihugu muri rusange. Kuba iherereye mu Mujyi wa Goma, umwe mu mijyi y’ingenzi y’ubucuruzi n’ubuyobozi mu Burasirazuba bwa RDC, byatumye iba kimwe mu bigo by’uburezi bifite uruhare rukomeye mu iterambere ry’akarere.
Kuva AFC/M23 yafata Umujyi wa Goma ndetse n’ibindi bice byinshi byo muri Kivu y’Amajyaruguru, yakomeje gushyiraho uburyo bw’imiyoborere bugamije gukomeza ibikorwa bya serivisi za leta n’ibigo bya rubanda.
Mu mezi ashize, iri huriro ryagiye rishyiraho abayobozi bashya mu nzego zitandukanye, rigaragaza ubushake bwo gukomeza kugenzura no kuyobora ibikorwa by’ubuzima bwa buri munsi mu bice rifiteho ububasha.
Ishyirwaho rya Prof. Jean Baptiste Kakoma Sakatolo Zambeze n’itsinda rishya ry’ubuyobozi bwa UNIGOM ni imwe mu mpinduka zikomeje kugaragaza uburyo AFC/M23 iri gukomeza kuvugurura no gutunganya imikorere y’inzego z’uburezi muri ibyo bice, mu gihe hakomeje ibiganiro bya politiki n’imbaraga zitandukanye zigamije gushaka umuti urambye w’ibibazo by’umutekano bimaze imyaka myinshi mu Burasirazuba bwa RDC.
