Minembwe: Ibitero bya Drone Byahitanye Abasirikare Benshi bo mu Ihuriro rya FARDC, Ingabo z’u Burundi, Wazalendo na FDLR
Amakuru aturuka mu misozi ya Minembwe, mu Ntara ya Kivu y’Amajyepfo, aravuga ko mu ijoro ryo ku wa Kane rishyira ku wa Gatanu habaye ibitero bikomeye bya drone byagabwe ku birindiro by’ingabo za FARDC n’abafatanyabikorwa bazo, bikaba byahitanye umubare munini w’abasirikare ndetse bigateza igihunga gikomeye mu ngabo zari ku rugamba.
Nk’uko amakuru atandukanye aturuka hafi y’ahabereye ibi bikorwa abyemeza, igitero cya mbere cyagabwe ahitwa Ruhinamavi, muri Lundu, aho ingabo za FARDC zari zifatanyije n’ingabo z’u Burundi, imitwe ya Wazalendo ndetse na FDLR. Iyo drone, kugeza ubu inkomoko yayo ikaba itaramenyekana ku mugaragaro, yateye ibisasu mu birindiro by’izo ngabo, bikaviramo benshi kuhasiga ubuzima, abandi bagahunga mu kajagari.
Amakuru y’abari hafi y’aho byabereye avuga ko icyo gitero cyabaye gitunguranye, ku buryo abasirikare bari muri ako gace batabonye umwanya uhagije wo kwitabara cyangwa kwikingira. Bivugwa ko nyuma y’iturika ry’ibisasu byinshi, bamwe mu basirikare bahise basubira inyuma mu rwego rwo gushaka aho bikinga.
Umwe mu bantu bakurikirana iby’umutekano muri ako karere yagize ati:
“Habaye igitero gikomeye cyane. Ingabo za FARDC, iz’u Burundi hamwe n’abarwanyi ba Wazalendo na FDLR bagabweho igitero cya drone batari biteze. Hari abahasize ubuzima benshi, abandi bahunga bava mu birindiro byabo.”
Si muri Ruhinamavi gusa habaye ibi bitero. Andi makuru avuga ko mu gace ka Rugezi na ho hagabwe ikindi gitero cya drone mu masaha y’iri joro, kigahitana abandi benshi bo mu ngabo zari zigize ihuriro rishyigikiye Leta ya Repubulika Iharanira Demokarasi ya Congo.
Ababikurikiranira hafi bavuga ko ikoreshwa rya drone mu mirwano ikomeje kubera mu misozi ya Minembwe rigaragaza uburyo uru rugamba rugenda rufata indi ntera, aho ikoranabuhanga rya gisirikare rikomeje kugira uruhare rukomeye ku mpande zihanganye.
Ibi bitero bibaye nyuma y’umunsi waranzwe n’imirwano ikomeye hagati y’umutwe wa MRDP-Twirwaneho n’ihuriro rigizwe na FARDC, ingabo z’u Burundi, Wazalendo na FDLR mu bice bitandukanye bya Minembwe. Amakuru ava ku rugamba avuga ko impande zombi zakomeje kurwanira kugenzura ibice bifatwa nk’iby’ingenzi mu rwego rwa gisirikare.
Nubwo kugeza ubu nta ruhande ruratangaza ku mugaragaro umubare nyakuri w’abahitanywe n’ibi bitero, amakuru y’ibanze akomeje kuvuga ko igihombo cyabaye kinini cyane ku ruhande rw’ingabo zagabweho ibyo bitero.
Mu gihe umutekano ukomeje kuba mubi muri Minembwe no mu nkengero zaho, abaturage bakomeje kugaragaza impungenge z’ingaruka z’iyi mirwano ikomeje gufata indi ntera, cyane cyane kubera ikoreshwa ry’intwaro n’ikoranabuhanga bishobora guteza ibyangiritse byinshi mu gihe gito.
