Ubuzima bw’Abanyekongo b’impunzi muri Kenya buri mu kaga: Me. Byashoni arasaba ubufasha no gutegurirwa gutaha
Umunyamategeko akaba n’umwe mu baharanira uburenganzira bwa muntu, Me. Maniragaba Byashoni John, yagaragaje impungenge zikomeye ku ngaruka z’icyemezo cyo guhagarika ibikorwa by’ubucuruzi buciriritse byakorwaga n’impunzi ndetse n’abanyamahanga muri Kenya.
Mu butumwa bwe yise “Plaidoyer Humanitaire”, avuga ko yabwandikiye i Bukavu, muri Kivu y’Amajyepfo, kuri uyu wa Gatandatu tariki ya 05/09/2026. Me. Byashoni avuga ko iki cyemezo cyateje impungenge n’ubwoba bukomeye mu miryango y’impunzi, cyane cyane ku Banyekongo benshi bari basanzwe batunzwe n’ubucuruzi buto n’ubucuruzi bwo mu muhanda.
Me. Byashoni: Iki cyemezo gishobora gukomeza ubukene mu mpunzi
Me. Byashoni avuga ko guhagarika ibikorwa by’ubucuruzi byakorwaga n’impunzi, mu gihe nta bundi buryo bwo kubeshwaho bwateganyijwe, bishobora gushyira benshi mu bukene bukabije ndetse no mu kaga ko kubura ibibatunga.
Yagize ati, ku mpunzi nyinshi z’Abanyekongo ziri muri Kenya, ubucuruzi buciriritse ni bwo buryo bw’ibanze bwo kubona amafaranga yo gutunga imiryango.
Akomeza avuga ko guhagarika iyo mirimo nta yandi mahitamo ahari bishobora gutuma izo mpunzi zihura n’inzara n’ubukene bukabije. Yibukije kandi ko benshi muri bo batavuye muri Repubulika Iharanira Demokarasi ya Congo ku bushake, ahubwo bahunze kubera intambara n’umutekano muke.
Yahuje iki cyemezo n’ubutumwa bwo gutaha ku bushake
Me. Byashoni yibukije ko iki cyemezo cyafashwe nyuma y’ubukangurambaga bwakorewe Abanyekongo bubasaba gutaha, by’umwihariko abaturuka mu Burasirazuba bwa Repubulika Iharanira Demokarasi ya Congo.
Muri ubwo bukangurambaga, hakomeje kugaragazwa ko kuba mu mahanga igihe kirekire bishobora gutera ibibazo ku bantu ndetse no ku rubyaro rwabo, birimo ibyago byo kutagira ubwenegihugu mu buryo bwuzuye no kugira amahirwe make yo kubona imirimo imwe n’imwe, cyane cyane mu nzego za Leta.
Me. Byashoni asanga icyemezo gishya cyafashwe muri Kenya gikwiye kuba isomo rikomeye kandi ridasanzwe, ariko akavuga ko hakwiye kubaho uburyo bwubahiriza uburenganzira n’icyubahiro by’impunzi.
Asaba ko impunzi zihabwa igihe n’ubufasha bwo gutaha
Mu byifuzo bye, Me. Byashoni arasaba ko impunzi z’Abanyekongo zigizweho ingaruka n’iki cyemezo zihabwa igihe gihagije ndetse zigahabwa ubufasha kugira ngo zibashe kwitegura no gutegura ubuzima bwazo mbere yo gusubira mu gihugu cyazo.
Asaba kandi ko Guverinoma ya Repubulika Iharanira Demokarasi ya Congo isaba ko amasezerano y’impande eshatu — Kenya, RDC na HCR — yasubukurwa, kugira ngo agarure uburyo bwo gutegura no gushyigikira abifuza gutaha.
Me. Byashoni avuga ko muri uwo murimo hakwiye no kugira uruhare urwego ruyobora uduce abateganya gutahamo, cyane cyane mu bijyanye n’umutekano n’ubutabazi, kugira ngo gutaha kw’impunzi kube ku bushake, mu cyubahiro kandi mu mutekano.
Yibukije igikomere cya Gatumba
Mu butumwa bwe, Me. Byashoni yanagarutse ku mateka akomeye y’Abanyamulenge bahungiye mu Gatumba mu Burundi, nyuma bakicwa bazira ubwoko bwabo.
Yibukije ko benshi mu mpunzi z’Abanyamulenge bagituye muri ako karere bakomeje kubana n’ingaruka z’ubwicanyi bwabereye mu Gatumba mu Burundi ku itariki ya 13/08/2004.
Avuga ko ayo mateka, afatanyije n’ihinduka ry’imibereho y’impunzi muri Kenya, ashobora kongera kubyutsa ubwoba n’ihungabana mu bantu bamaze imyaka myinshi baba mu buhungiro.
“Gusubira mu gihugu bigomba kuba mu mutekano no mu cyubahiro”
Ku bwa Me. Maniragaba Byashoni John, ikibazo cy’impunzi ntigikwiye kureberwa gusa mu ndorerwamo y’amategeko n’imiyoborere, ahubwo kigomba no kureberwa mu rwego rw’ubutabazi, umutekano n’uburenganzira bwa muntu.
Asanga niba hari gahunda yo gufasha impunzi z’Abanyekongo gusubira mu gihugu cyabo, hakwiye kubanza gushyirwaho uburyo bubafasha kwitegura, kugera aho bataha mu mutekano no kongera kubaka ubuzima bwabo, aho kubasiga mu bukene nyuma yo gutakaza uburyo bari basanzwe babeshwaho.
