Uvira: Mai-Mai wiyita “Gen Fyeka Adui wa Congo” yatawe muri yombi na FARDC
Amakuru aturuka mu mujyi wa Uvira, mu Ntara ya Kivu y’Amajyepfo, aravuga ko umwe mu barwanyi ba Mai-Mai uzwi ku izina rya “Gen Fyeka Adui wa Congo” yatawe muri yombi n’abasirikare ba FARDC, mu gihe impamvu nyayo y’itabwa muri yombi kwe itaratangazwa ku mugaragaro.
Amakuru Minembwe Capital News (MCN) yakusanyije avuga ko Fyeka Adui wa Congo yafashwe n’abasirikare ba FARDC bari mu gace ka Uvira, afatwa ari kumwe n’abamurindaga (escorts), nyuma bose bakajyanwa mu maboko y’inzego za gisirikare.
Umwe mu bantu bavuga ko bari hafi y’aho yafatiwe, yabwiye MCN ko ibi byabaye ahagana saa munani z’amanywa, ubwo FARDC yafataga Fyeka Adui wa Congo kuri poro ya Kivovo.
Uyu mutangabuhamya yagize ati:
“Ahagana saa munani z’amanywa, FARDC yafashe Mai-Mai Gen Fyeka Adui wa Congo bamufatiye kuri poro ya Kivovo, yari kumwe n’abamurindaga. Bahise babashyira mu modoka ya FARDC. Nyuma baje kumufungira kuri B2, babwira abamurindaga guhita bataha.”
Impamvu y’itabwa muri yombi ntiratangazwa ku mugaragaro
Kugeza ubu, nta tangazo ryemewe na FARDC MCN yabonye risobanura impamvu nyayo yatumye Fyeka Adui wa Congo atabwa muri yombi.
Icyakora, amakuru ava mu bantu bo muri ako gace avuga ko ashobora kuba akurikiranyweho kugira uruhare mu gushishikariza cyangwa gukomeza imyitwarire y’abarwanyi ba Wazalendo, cyane cyane mu gihe habayeho kutumvikana ku byerekeye ubuyobozi bw’ibikorwa by’umutekano muri Uvira.
Umwe mu batangabuhamya yagize ati:
“Nta muntu ubizi neza, ariko ni we wateje imvururu muri cya gihe cya Gen. Gasita.”
Kutumvikana hagati ya Wazalendo na FARDC
Amakuru atangwa n’abaturage bo muri Uvira avuga ko mu bihe bishize habayeho ukutumvikana hagati ya bamwe mu barwanyi ba Wazalendo n’inzego za FARDC, cyane cyane ku bijyanye n’imiyoborere n’uburyo ibikorwa by’umutekano bigomba gukorwa muri uyu mujyi no mu nkengero zawo.
Ni muri uwo murongo kandi havugwamo ikibazo cy’umugore wari witeguye gushyingura umugabo we wari umusirikare wa FARDC wari uherutse kwitaba Imana. Amakuru avuga ko hari abari mu mitwe ya Wazalendo batashakaga ko uwo musirikare ashyingurwa i Uvira.
Bamwe mu bantu batanga amakuru bavuga ko Fyeka Adui wa Congo yagize uruhare mu gukomeza uwo mwuka wo kutumvikana.
Amagambo akomeye ku gisirikare cya FARDC
Fyeka Adui wa Congo kandi azwi muri ako gace kubera amagambo akomeye akunze gutangaza yerekeye FARDC.
Amakuru avuga ko mu mvugo ze, akunze kuvuga ko FARDC ishobora kwirukanwa i Uvira no mu nkengero zayo, ndetse akagaragaza ko igihe icyo ari cyo cyose hashobora kubaho impinduka ku bijyanye n’ububasha bw’inzego za gisirikare muri ako karere.
Ibi byagiye bituma izina rye rikomeza kugarukwaho mu biganiro bijyanye n’umutekano n’imibanire hagati ya FARDC n’imitwe yitwaje intwaro ikorera mu bice bitandukanye bya Kivu y’Amajyepfo.
Ibyo tutaramenya
Kugeza ubu, haracyari ibibazo byinshi bitarasubizwa ku bijyanye n’itabwa muri yombi rya Fyeka Adui wa Congo.
Minembwe Capital News (MCN)
