Umujyi wa Tushunguti wigaruriwe na AFC/M23 nyuma y’imirwano ikomeye i Kalehe
Umujyi wa Tushunguti uherereye muri grupema ya Ziralo, muri teritwari ya Kalehe mu Ntara ya Kivu y’Amajyepfo, wigaruriwe n’ihuriro Alliance Fleuve Congo (AFC/M23), rivuga ko rigamije guhirika ubutegetsi bwa Perezida Félix Tshisekedi. Ibi byabaye nyuma y’imirwano ikomeye yamaze iminsi ibiri ihanganishije ingabo za Repubulika Iharanira Demokarasi ya Congo (FARDC), ku bufatanye n’imitwe ya Wazalendo na FDLR, n’ihuriro AFC/M23.
Nk’uko amakuru aturuka mu nzego z’umutekano n’abaturage baho abivuga, iyi mirwano yatangiye ku wa Gatandatu tariki ya 02/05/2026, ubwo AFC/M23 yagabwaho igitero ku birindiro byayo byari hafi y’uyu mujyi ufite akamaro kanini mu buhahirane hagati ya Kivu y’Amajyepfo na Kivu y’Amajyaruguru. Ifatwa ry’uyu mujyi ryabaye nyuma y’uko ku munsi wabanje, ku wa Mbere, iri huriro rya AFC/M23 ryari ryigaruriye utundi duce tubiri twegereye ako gace, rimaze kwirukana FARDC n’abafatanyabikorwa bayo.
Iyi mirwano yaranzwe n’amasasu menshi ndetse hakoreshejwe n’intwaro ziremereye, bikomeza kugeza ku Cyumweru tariki ya 03/05/2026, ubwo Wazalendo basubiraga inyuma bakerekeza mu gace ka Biriko, gaherereye muri teritwari ya Walikale.
Ibi byahise biha AFC/M23 kugenzura Umujyi wa Tushunguti.
Tushunguti ifatwa nk’ahantu h’ingenzi cyane mu rwego rwa gisirikare n’ubuhahirane, kubera aho iherereye ku mupaka uhuza intara za Kivu y’Amajyepfo na Kivu y’Amajyaruguru. Ni na kimwe mu bice bikunze kurangwa n’imirwano ihoraho.
Kugeza ubu, amakuru aturuka muri ako gace avuga ko AFC/M23 igifite ubuyobozi bwa Tushunguti, mu gihe FARDC, FDLR na Wazalendo bivugwa ko bahungiye mu bice byo muri Walikale. Gusa kugeza ubu nta tangazo riratangazwa n’impande za gisirikare za Leta cyangwa AFC/M23 ku by’iyi mirwano.
Icyakora, abaturage benshi bongeye guhunga berekeza mu duce tubonekamo umutekano, bikomeza gukaza ikibazo cy’ubuhunzi n’umutekano muke mu burasirazuba bwa RDC.
Iyi mirwano ije isanga akarere ka Kivu kari gasanzwe kugarijwe n’ibibazo by’ubuhunzi ndetse n’ibura ry’ibanze ry’ibiribwa n’imiti. Imiryango itandukanye y’ubutabazi ikomeje kugaragaza impungenge ko gukomeza kwiyongera kw’imirwano bishobora kongera umubare w’abava mu byabo no gukaza ikibazo cy’ubutabazi mu karere.
Ifatwa rya Tushunguti n’ihuriro AFC/M23 rikomeje kugaragaza ko ikibazo cy’umutekano mu burasirazuba bwa RDC kigikomeje kuba ingorabahizi kandi gisaba ibisubizo birambye. Mu gihe imirwano ikomeje guhinduranya uduce tugenzurwa n’impande zihanganye, abaturage bakomeje kuba mu gihirahiro cy’umutekano muke n’ingaruka z’intambara.
