Imyitwarire ya Kinshasa Ikomeje Guhungabanya Amahoro mu Burasirazuba bwa RDC
Guverinoma ya Kinshasa ikomeje gukoresha ibisasu bya drones mu kugaba ibitero mu bice bitandukanye by’Amajyaruguru y’uburasirazuba bwa Repubulika ya Demokarasi ya Congo (RDC). Kuri uyu wa Gatanu, tariki ya 02/01/2025, ingabo za RDC zagabye igitero muri centre ya teritwari ya Masisi, mu Ntara ya Kivu y’Amajyaruguru, aho abaturage bakomeje guhura n’ingaruka z’ibi bitero.
Ibi bikorwa, bigamije kugaba ibitero ku baturage b’inzirakarengane, biracyabangamira amahoro n’umutekano mu karere, binyuranyije n’amategeko mpuzamahanga agenga intambara ndetse n’amasezerano y’amahoro ya Doha muri Qatar. Umuburo ugaragara ni uwo kwerekana ko Guverinoma ya Kinshasa igaragaza umugambi wo gukomeza intambara, aho guharanira amahoro no kubahiriza uburenganzira bwa muntu.
Abaturage ba Masisi bakomeje guhura n’ibibazo bikomeye, harimo kubura ababo no guhungabana mu mutima kubera ibitero bya drones byibasiye abantu b’inzirakarengane. Ibi bikorwa bya gisirikare bikomeje kubangamira imishyikirano y’amahoro, bigatuma inzira yo kugera ku mahoro igaragara nk’ifite intege nke.
Nubwo amahanga akomeje gusaba kubahiriza amategeko agenga intambara, guverinoma ya Kinshasa irakomeza kurenga ku masezerano mpuzamahanga, ikomeza gushyira abaturage ku rugamba. Ibi bishimangira ko ikibazo cy’umutekano n’ingaruka z’ibi bitero bikomeje gusaba kwitabwaho n’amahanga, hagamijwe gukumira ibitero bya drones no kurengera uburenganzira bw’ikiremwamuntu.
Ibitero bya FARDC byabaye uyu munsi byibasiye centre ya Masisi n’inkengero zayo, bikomeza gushimangira isura y’akaga kugarije abaturage bo mu Burasirazuba bwa RDC.
